شال: پہ زور بیگواھیں مرمانی آجوئی ءَ وائس پار بلوچ مسنگ پرسن ( وی بی ایم پی ) ءِزھرشانی کیمپ ءَ 5878 روچ سرجم بیتگ۔ دوشمبے ءِ روچ ءَ گل ءِ ایگزیکٹو کمیٹی ءِ باسک نیاز نیچاری گدان ءَ ساڑی بیتگ ءُ زور بیگواھیں مھمود الی لانگو ءِ کھول ھم کیمپ ءَ اتکگ۔
زور بیگواھیں مھمود الی لانگو ءِ مات ءِ گوشگ اِنت کہ منی زھگ پاکستانی پوج ءَ چہ اوگان پوج ءِ کمک ءَ 18 جون 2024 ءَ اوگانستان ءِ ھند نمروز ءَ دزگیر کرتگ ءُ پاکستان ءِ دست ءَ دیگ بیتگ۔
آئی ءَ گوشتگ کہ منی زھگ اوگانستان ءَ باھوٹی ءِ زند گوازینگ ءَ بیتگ ، پمشکا کہ مھمود الی لانگو ءَ اد ءَ پاکستانی پوج ءَ باز تنگ کرتگ ھمے سوب ءَ آ لاچار بیتگ ءُ اوگانستان ءَ شتگ کہ ایمنیں زندے بہ گوازین ایت چہ بد بھتی ءَ ھمود ءَ بیگواہ کنگ بیتگ۔
مات ءِ گوشگ اِنت کہ من پہ وتی زھگ ءِ آجوئی ءَ ایمنیں زھرشانی ھم کرتگ ءُ بلوچستان آمیدگس ءُ پہ زور بیگواھیں مردماں جوڑ بیتگیں کمیشن ءَ ھم شتگ آں، بلے انگت ءَ من ءَ پہ منی زھگ ءِ بابت ءَ ھچ وڑیں سرپد دیگ ءَ نہ اَنت۔ چہ ایشی سوب ءَ مئے سرجمیں کھول رنجانی دیمپان اِنت۔
نیاز نیچاری ءَ گوں سرکار ءُ ادارھانی سروکاں لوٹ کرتگ کہ آ مھمود الی لانگو ءَ ھوار پہ درسیں بیگواھیں مردمانی کھولاں ڈیھ ءِ کانود ءِ رد ءَ پہ انساپ دیگ ءَ وتی کرد ءَ پیلو بہ کن اَنت ءُ آیاں چہ سرجمیں زندگی ءِ رنجاں بہ رکین اَنت۔
