بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ گوستگیں روچ ءَ آپریشن بام ءِ میان ءَ سره ڈاکئی ءَ چه دو مساپر بساں پوج ءُ چیریں ادارھانی 9 کارمند پوجی ادارھانی گون ءَ ھمگرنچ بوگ ءِ بنیاد ءَ ایر گیجگ ءُ کشگ بیتگ ، اے ویل ءِ بگیری ءَ چه پاکستانی پوج ، آئی ءِ چریک ءُ ریاستی رسانکدر ءَ چہ واہ ءُ پریات ءَ گمان کنگ بیت کہ بی ایل ایپ ءِ سرمچاراں چونیں ٹوھیں ڈکے دژمن ءَ را جتگ۔
آئی ءَ گوشتگ که گوستگیں روچ ءَ زورگریں پوج ، آئی ءِ داشتگیں رسانکدر ءُ دلّار کوکار کنگ ءَ اَنت که بی ایل ایپ ءِ سرمچاراں لس مساپر پنجاپی بوگ ءِ بنیاد ءَ ایر گیپتگ ءُ کشتگ اَنت بلے راستی چوش اِنت که اے مردم پوج ءُ چیریں ادارھانی کارمند بیتگ اَنت که اے بابت ءَ بی ایل ایپ ءِ انٹیلیجنس ونگ ءَ چه پیش ءَ منانک ءُ سرپدی بیتگ ءُ بی ایل ایپ ءِ انٹیلیجنس ونگ ءَ زورگریں پوج ءُ چیریں ادارھانی کارمندانی بابت ءَ گپتگیں سرپدی آپریشن بام ءَ بھر زرتگیں آپریشنل یونٹس ءَ داتگ اَنت که ایشی پارست ءَ سره ڈاکئی ءِ دمگ ءَ پٹ ءُ پول ءِ میان ءَ چه دو بساں اے نُھیں کارمند پجارگ ءُ چه بس ءَ درکنگ ءُ گڈی آسر ءَ سر کنگ بیتگ اَنت ، زورگریں پاکستانی پوج ءُ آئی دلار په جھان ءِ بد گمان کنگ ءَ دروگیں ھیلھانی پارست ءَ کشگ بیتگیں کارمنداں لس مساپر گوشگ ءَ اَنت ، بژنی گپ ایش اِنت که بی بی سی اردو ءَ ھوار آدگه مزنیں رسانکدر اَبید ءِ جست ءُ پکا کنگ ءَ پاکستانی ریاست ءِ دروگیں ھالانی شنگ کنگ ءَ ھوار بیتگ اَنت که اے په آیانی رسانکدری ارزشت ءَ جست ودی کنت۔
جارکش ءَ گوشتگ که آپریشن بام ءِ میان ءَ سرجمیں بلوچستان ءَ سدانی کچ ءَ مساپر بس ، ویگن ءُ ھزارانی کچ ءَ آدگه گاڑی بی ایل ایپ ءِ سرمچاراں شھدگانی بند کنگ ءِ میان ءَ داشتگ ءُ پٹ ءُ پول کرتگ اَنت که آیانی سر ءَ سدانی کچ ءَ پنجاپ ءِ جاه منندیں مردم سپر کنگ ءَ بیتگ اَنت بلے ریاست ءِ دروگیں ھیلھانی پیم ءَ نه کرتگ ءُ آیاں دمگی یا زاتی پجار ءِ بنیاد ءَ هچ وڑیں تاوانہ داتگ بلکیں آ وتی منزل ءِ نیمگ ءَ دیم دیگ بیتگ اَنت ، سره ڈاکئی ءَ چه دو بساں پٹ ءُ پول ءِ میان ءَ نُھیں کارمندانی پجار پوج ءُ چیریں ادارھانی کارمند بیتگ اَنت که سرمچاراں ایر گیپتگ ءُ کشتگ اَنت ، آ لس مساپر یا پنجاپی مزدور نه بیتگ اَنت بلکیں لس مساپر ءِ دروشم ءَ پوج ءُ چیریں ادارھانی کارمند بیتگ اَنت که بلوچ ءِ چکچینی ، زوربیگواھی ءُ جنگی میارباریاں ھوار بیتگ اَنت.
آئی ءَ گوشتگ که ما اے درشان ءِ پارست ءَ پاکستان ءِ دوستدار ھاس پنجاپی راج ءِ دیم ءَ وتی بے میاری ءَ پیش کنگ ءَ نہ ایں بلکیں بلوچ راجی آجوئی زرمبشت ءِ بگیری ءَ په جھان ءِ بد گمان کنگ ءَ پاکستان ءِ ھیلھ ءُ دروگیں پندلانی پاشک کنگ ءَ اے درشان ءَ شنگ کنگ ایں ، اے دروگیں پندل ھم بلوچ راجی آجوئی زرمبشت ءِ بگیری ءَ زورگریں پاکستانی ریاست ءِ رسانکدری جنگ ءِ یک بھرے۔
میجر گھرام بلوچ ءَ درشان ءِ گڈی ءَ گوشتگ که اے گپ هم دلگوش کنگ لوٹ ایت که بلوچستان ءَ ناں مزنیں دیمروئی ھست ناں چونیں مزنیں شھر ءُ کار ءُ باری جاه ءُ روزگار ءِ چونیں راه ءُ در ھست ، نوں اے گپ ءِ سر ءَ جیڑگی اِنت که اے جنگ آماچیں ڈیھ ءَ کجام پنجاپی په مزدوری ءُ کار ءُ بار ءَ کیت ؟ بلے چه اے راستی ءَ ابید ھم سدانی کچ ءَ پنجاپی سپر کنگ ءِ میان ءَ یل کنگ بیتگ اَنت که آیانی بگیری ءَ پوج یا چیریں ادارھانی گون ءَ سیادی دارگ ءِ ھچ وڑیں منانک نه بیتگ ، سرمچاراں کسے آئی دمگ یا زاتی پجار ءُ شک ءِ بنیاد ءَ تاوان نه داتگ۔
