شال: پہ زور بیگواھیں مردمانی آجوئی ءَ وائس پار بلوچ مسنگ پرسنءِ زھرشانی گدان ءَ 5876 روچ سرجم بیتگ۔ مرچی جتائیں بھرگاں سیادی داروکیں مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ سرکماش نسر اللہ بلوچ ءَ گوشتگ کہ ماہ جبین بلوچ ءَ 29 مئی ءَ چہ شال ءِ درسرکاری نادراھجاہ ءَ پوج ءَ آوار جنگ ءَ پد بیگواہ کرتگ داں مرچی ھم نہ آمیدگس ءَ پیش کنگ بیتگ ءُ نہ کھول ءَ آئی بابت ءَ سرپدی دیگ بیتگ۔ اے سکا بژنی گپے ءُ درکانودی گامگیجے ایشی چنچو ایر بہ جن ئے کم اِنت۔
نسر اللہ بلوچ ءَ گوں سرکار ءُ ڈیھ ءِ ادارھانی سروکاں لوٹ کرتگ کہ اگاں ماہ جبین ءِ، سر ءَ چونیں بھتامے ھست گڑا آمیدگس ءَ پیش کنگ بہ بیت۔ اگاں آ بے میار اِنت گڑا پہ آئی زوتیں آجوئی ءَ دلجمی دیگ ءَ وتی کرد ءَ پیلو بہ کن اِت۔
