بلوچستان لبریشن پرنٹ ( بی ایل ایپ ) ءِ نیمگءَ آپریشن بام ءِ جار ءَ پد بلوچستان ءِ جتائیں ھندءُ دمگاں پاکستانی پوج ءُ آئی ءِ شوربندیانی سر ءَ اُرش گوں ترندی ءَ برجاه اَنت۔ اے میان ءَ شست ءَ گیش کاروائی کنگ بیتگ، اے کاروائیانی میان ءَ بی ایل ایپ ءِجنگولاں جتا جتائیں جاھاں دگ بستگ ءُ گاڑی پٹ ءُ کرتگ اَنت۔
ھالانی رد ءَ اے کاروائیانی تہ ءَ پاکستانی پوج ءُ چیریں ادارھاں ابید مادن بروکیں گاڑی، پولیس ءُ لیویز تانہ، چاریگی کیمرہ، موبائل ٹاور ءُ آدگہ بازیں سرکاری شوربندی نشانگ کنگ بیتگ اَنت۔سرمچاراں دگ بندی ءِ میان ءَ گوں لس مردماں آجوئی جنز ءِ بابت ءَ گپ جتگ۔
مرچی موسا کیل ءَ میکتر ءُ کجھوری ءِ میانجی ءَ بلوچ سرمچاراں دگ بستگ ءُ پٹ ءُ پول کرتگ ، سرمچاراں پٹ ءُ پول کنگ ءِ میان ءَ ایم آئی ءُ آئی ایس آئی ءِ 9 کارمند پجارگ ءَ پد چہ گاڑی ءَ ایر کرتگ ءُ تیرگواری کرتگ ءُ کشتگ اَنت۔
اے درچ ءَ بلوچستان سرکارءِ جارکش شاھد رند ءَ جتائیں جاھاں اُرشانی گپ راست کرتگ ءُ گوشتگ کہ شال، کلات، مستونگ ءُ سرڈھاکہ ءَ سلاہ بندیں مردماں ارش کرتگ۔
آئی ءَ بھتام جتگ ءُ گوشتگ کہ سلاہ بندیں مردماں سرڈھاکہ ءِ نزیک ءَ مساپر آوار جتگ اَنت ءُ پہ آیانی آجوئی ءَ لشکرکشی برجاہ اِنت۔
اے بابت ءَ بلوچستان لبریشن پر نٹ ءَ انگت ءَ وتی بام آپریشن ءِ سرجم کنگ ءِ جار نہ جتگ ءُ سرجمیں کاروائیانی ھال شنگ نہ کرتگ اَنت۔
چوش کہ چہ بلوچ رسانکدر ءَابید ڈنی رسانکدر ھم بام آپریشن ءِ بابت ءَ رپورٹ کنگ ءَ اَنت۔
چہ بی ایل ایپ ءِ نیمگ ءَ بام آپریشن ءِ جار ءَ پد بلوچ رسانکدر ءَ گوں جتائیں بھرگاں سیادی داروکیں مردمانی تہ ءَ یک وشی یے گندگ بوگ ءَاِنت۔
