بلوچ نیشنل مومنٹ ( بی این ایم ) ءِ کیپسٹی بلڈنگ ءِ دیوان 5 جولائی 2025 ءَ پارٹی ءِ سینئر وائس چیئرمین ڈاکٹر جلال بلوچ ءِ سروکی ءَ برجم دارگ بیتگ۔ دیوانءَ کونسل ءِ پوکس پرسن ھپیز ابداللہ بلوچ ءَ گوستگیں سے سالانی رپورٹ پیش کرتگ، ایشی ءِ تہ ءَ ھیلکاری پروگرامانی بابتءَ گامگیج ءُ کرتگیں کارانی سرءَ دلگوش دیگ بیتگ۔
وتی ترانانی تہ ءَ ھپیز ابداللہ بلوچ ءَ گوشتگ کہ کیپسٹی بلڈنگ ءِ کونسل ٹیم ءَ گوں سکا جپاکشی ءُ گل ءِ راھبندانی ھساب ءَ سے سالانی میان ءَ بنجاھی، ھنکین ءُ بنزھانی نیمگ ءَ 278 ھیلکاری دیوان کرتگ۔
آئی گوشگ اِنت کہ تھنا اے کچ ءُ کساس یک مزنیں سوبمندی یے بلے مستریں سوبمندی ھمیش اِنت کہ اے سے سالانی میان ءَ ھیلکاریءِ کار ھچ وڑ ءَ اوشت ءِ آماچ نہ بیتگ۔ اے درچ ءِ دارگ مئے ھواریں ٹیمورک، ادارہ ءِ بنیاد ءَ ھمگرنچی ءُ گوں تچکیں شوربندی ءَ بندوک اِنت۔ آئی ءَ اے سوبمندی درسیں ٹیمورک ءِ لیک اِتگ کہ آیاں گوں ایمانداریءَ وتی پرز پیلو کرتگ۔
دیوان ءَ کونسل ءِ باسک ءَ وتی ھیال درشان کرتگ اَنت ءُ گوشتگ کہ ھما ٹیمورک ءَ یکشل ءَ گوں ایمانداری ءَ داں سے سالاں ھیلکاری ءِ کار دیم ءَ برتگ گڑا مرچی آئی شریں آسر درسانی دیم ءَ اِنت۔ کارکناں ھمے گپ ءِ سرءَ زور داتگ کہ ھیلکاری پروگرام چونیں ھم گلے ءِ لیکہ ءُ کردی کارانی مانزمان اِنت ۔ بی این ایم ءِ سروک ءُ کارکناں اے پڑ ءَ وتی بودناکی جوانیں وڑے ءَ پیش داشتگ۔
دیوان ءَ تران کنان ءَ پارٹی ءِ سینئر وائس چیئرمین ڈاکٹر جلال بلوچ ءَ کیپسٹی بلڈنگ ءِ کونسل ءِ کار ساڑاتگ اَنت ءُ گوشتگ کہ 278 ھیلکاری پروگرامانی برجاہ دارگ یک مزنیں سوبمندی یے۔ چہ درساں مستریں سوبمندی ھمیش اِنت اے وھدانی میان ءَ ھیلکاری کار یکشل ءَ برجاہ بیتگ اَنت۔ ھمے درچ ادارہ ءِ مھکمی ءِ چیدگ اِنت۔ اے ھما بنیاد اِنت کہ گون ایشی پارٹی ءِ درسیں کار بندوک اَنت۔
آئی ءَ گوشتگ کہ بی این ایم ءِ گل ءِ دیمروئی، کارکنانی لیکھی بودناکی ءُ سروکانی ھیلکاری یک ھواریں شوربندی یے ءِ رد ءَ برجاہ اَنت۔ ایشی آسر ءَ ما یک جوانیں وڑے ءَ گندگ ءَ ایں۔ مرچی ما گند ایں کہ گل چہ پیش ءَ انوں گیشتر مھکم ءُ لیکھی نیمگ ءَ گندگ بیت۔
دیوان ءِ دومی بھر ءَ پہ ھیلکاری ورکشاپاں پوکل پرسن گچین کنگ بیتگ۔ چہ کونسل ءِ باسکاں پہ اے زمہ واری ءَ دیدگ بلوچ گچین کرتگ۔ دیدگ بلوچ ءَ سنگتانی منت گپتگ ءُ گوشتگ کہ انچوش پہ ھیلکاری پروگراماں ما گوں مچی ءُ ھمکاری ءَ اے کار کرتگ، پہ ورکشاپاں ھمے وڑ ءَ کار کنگ لوٹ ایت۔ من شریں وڑے ءَ جھد کن آں کہ پہ اے کار ءَ ھچ وڑیں کمی مہ بیتءُ ما یکشل ءَ ایشی ءَ برجاہ بدار ایں۔
پروگرام ءِ گڈسر ءَ ڈاکٹر جلال بلوچ ءَ گوشتگ کہ بی این ایم ءِ مول انچیں سیاسی سروک ءُ کارکنانی تیار کنگ اِنت کہ نہ تھنا چہ راجی زانشت ءَ پراوست بہ بنت بلکیں لیکھی، کردی ءُگل ءِ کاراں بودناک بہ بنت۔
اے وڑیں پروگرام ھما بندات اَنت کہ پہ باندات ءَ بودناک ودی کن اَنت۔ ما ھما روچ ءَ سوبین بہ ایں کہ مئے پارٹی ءَ سروک ءُ کارکن ءِ کمی مہ بیت۔ بلکیں ھمک پڑءَ ھیلکار، زانوگر، باسما ءُ لیکھی کارکن ساڑی بہ بنت۔
دیوان گوں پر اوستی ءَ آسر کنگ بیتگ کہ بی این ایم ءِ گل ءِ ھیلکاری دیم ءَ گھتر بنت ءُ گوں جوانیں مول ءُ ھمگرنچی کنگ ءِ کول کنگ بیتگ۔ بھر زوروکاں ھمے گپ ءِ سر ءَ تپاک کرتگ کہ کیپسٹی بلڈنگ ءِ وڑیں ادارھے پہ پارٹی ءِ گل ءُ لیکھی بنیاد ءَ مھکم کنگ ءَ جوانیں کرد پیلو کنت۔
