شال: چیریں ادارھانی کارمندانی دست ءَ زوربیگواه کنگ بیتگیں گلام الی بلوچ ءِ کھول ءَ آئی ءِ یل کنگ ءِ لوٹ کرتگ.
بنشون ءِ رد ءَ گلام الی بلوچ مستونگ ءِ جاه منند اِنت که 22 جون ءَ پاکستانی چیریں ادارھانی کارمنداں شپ ءِ ادار سے ءَ چه شال ءِ ھند جناه ٹاؤن ءَ آوار جتگ ءُ برتگ. ریاستی کارمنداں آئی ءِ کھول ءَ دلجمی داتگ که گلام الی چه جست ءُ پرس کنگ ءَ پد یل کنگ بیت بلے چه 16 روچ ءِگوزگ ءَ پد آ انگت بیگواه اِنت.
کھول ءَ گلام الی ءِ زوربیگواھی ءِ کیس جناه ٹاون ءِ پولیس اسٹیشن ءَ هم یاداشت کرتگ بلے انگت اے بابت ءَ ھچ وڑیں دیمروئی نه بیتگ.
گلام الی بلوچ ءِ کھول ءَ گوں انسانی ھکانی اداره ءُ بلوچ راج ءَ لوٹ کرتگ که آ گلام الی ءِ زوت یل کنگ ءِ بابت ءَ توار چست به کن اَنت دانکه آ زوت آجو کنگ به بیت.
