بلوچ نیشنل موومنٹ ( بی این ایم ) ءِ سروک ءُ بی ایس او ءِ پیشیگیں کارگشاد میر سپیر بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بلوچ یکجھتی کمیٹی ءِ سروکانی یکبرے پد ءَ دروگیں کیس ءَ دزگیری ریاست ءِ ترس آماچ بوگ ءِ نشان اِنت۔
میر سپیر بلوچ ءَ گوشتگ که بی وائی سی ءِ سروک ڈاکٹر ماه رنگ بلوچ ، سبگت الله شاه جی ، بیبگر بلوچ ، گپار بلوچ ، گلزادی ءُ بیبو بلوچ تھری ایم پی او ءِ ھلاس بوگ ءَ پد دگه لھتیں دروگیں کیس ءِ پارست ءَ دزگیر کنگ بیتگ اَنت که اے ریاست ءِ ترس آماچ بوگ ءُ آمیدگسانی ریاست ءِ پیسلھاں پیش دار ایت۔
آئی ءَ گوشتگ کہ چه آمیدگس ءِ نیمگ ءَ بی وائی سی ءِ سروکانی بندیگی وھد ءَ ده روچ گیش کنگ ءُ پولیس ءِ دست ءَ دیگ ءِ مول ریاستی زوراکیانی بگیری توار چست کنوکیں مردمانی بندیگی ءِ دراجکش کنگ اِنت ۔
سپیر بلوچ ءَ گوشتگ کہ کازیانی ھواری ءَ آمیدگس ءِ بیوکیں دیوان ءِ روچ ءَ ناشرکاری ءِ دروگیں کیس ءَ دزگیر کنگ ھمے گپ ءَ پدر کنت که ریاست تچک ءَ ترس ءِ آماچ بوتگ۔ تھری ایم پی او ءِ ھلاس بوگ ءَ پد یکبرے پد ءَ پولیس ءِ دست ءَ دیگ ءُ دروگیں کیس اے گپ ءِ نشان اِنت۔
آئی ءَ گوشتگ که ھچ وڑیں ریاستی ھیلھاں ڈاکٹر ماه رنگ بلوچ ءُ آدگه سنگتانی توکل پروشت دات نه کرتگ ءُ بلوچ راج ءِ سر ءَ آیانی سان ھم کم نه کرتگ۔
