کیچ: بلوچ یکجھتی کمیٹی ءِ نیمگ ءَ بلوچ چکچینی ءِ بگیری ءُ اسلام آباد ءَ برجاھیں زھرشانی نندانک ءِ پلہ مرزی ءَ کیچ ءُ گوادر ءَ ھوار جتائیں جاھاں زھرشانی کنگ بوتگ۔
سے شمبے ءِ روچ ءَ مند، تمپ، دشت کڈان، گْوادر، پسنی، ھورماڑہ، گڈانی ءُ منگچر ءَ زھرشانی روانک کشگ بوتگ اَنت۔ زھرشانیاں زور بیگواھیں مردمانی کھول، جنین ءُ زھگاں ھوار جتائیں بھرگاں سیادی داروکیں مردماں بازیں کچاں بھر زرتگ۔
زھرشانی ءَ ھواریں مردماں زور بیگواھیں مردمانی اکس، بینر ءُ پلے کارڈ دستاں بوتگ اَنت کہ آیانی سر ءَ جتا جتائیں اوگام نبشتہ بوتگ۔
زھرشانی کنوکیں مردماں بلوچستان ءَ زوریں بیگواھی، دروگیں میڑاں زور بیگواھیں مردمانی ناھکیں کوش، پاکستانی لشکر ءِ زوراکیانی بگیری ءَ اوگام جتگ ءُ اسلام آباد پریس کلب ءِ دیم ءَ بلوچ یکجھتی کمیٹی ءِ نیمگ ءَ برجاھیں زھرشانی نندانک ءِ پلہ مرزی ءَ اوگام جتگ۔
یات بہ بہ اِت کہ بلوچ یکجھتی کمیٹی ءِ نیمگ ءَ برجاھیں زھرشانی ءِ سیمی پیز اِنت اے درگت ءَ بلوچستان ءِ جتا جتائیں ھند ءُ دمگاں زھرشانی برجاہ اَنت۔ بازیں شھرانی تہ ءَ ھزارانی کچ ءَ مردماں بھر زرتگ۔
اے زھرشانیانی پارست ءَ چہ بلوچستان ءَ ڈن سند ءُ پنجاپ ءِ جتائیں شھرانی تہ ءَ زھرشانی روانک کشگ بوتگ اَنت۔
