زور بیگواھیں بلوچ نودربر سروک شبیر اھمد ءِ گھار ءُ انسانی ھکانی کارکن سیما بلوچ ءَ وتی شنگ کرتگیں تامربندے ءَ گوشتگ کہ زیشان زھیر شپ ءَ آوار جنگ ءُ پد ءَ سھب ءَ آئی ژانگولیں لاش چگل دیگ بیت۔ ھمے جیڑہ ءِ بابت ءَ بلوچ یکجھتی کمیٹی ءَ زھرشانی کنگ ءِ جار جتگ اَت۔
آئی ءَ گوشتگ کہ ھمے زھرشانیانی درچ ءَ 3 جولائی ءَ کراچی ءَ زھرشانی کنگ بیتگ اَت اود ءَ سند پولیس ءَ زوراکی کرتگءُ مردم لٹ ءُ کٹ کرتگ ءُ دزگیر کرتگ اَنت۔ ھمے وڑ ءَ ھب چوکی ءَ پریس کلب ءِ دیم ءَ مئے زھرشانی بیتگ بندات ءَ پولیس ءَ پریس کلب بند کرتگ ءُ مارا روگ ءَ نہ اشتگ، پد ءَ ما لاچار بیتگ ایں ءُ دگ ءِ سر ءَ زھرشانی کنگ بندات کرتگ گڑا پولیس ھمود ءَ اتکگ ءُ زوراکی کنگ بندات کرتگ ۔ تیرگواری کرتگ ءُ مئے مردم لٹ ءُ کٹ کرتگ اَنت۔
آئی ءَ گوشتگ کہ چہ پولیس ءِ زوراکیاں مئے مردم ٹپی بیتگ اَنت ءُ پولیس ءَ منی گھار ءَ ھوار سے جنین گِران کرتگ ءُ وتی گاڑی ءَ سوار کرتگ ءُ برتگ اَنت۔ ما شپ ءَ نہ زانتگ کہ آ چون ءُ گوں کجام جاوراں اَنت۔ ما وتی مردم پولیس تانھاں دیم داتگ اَنت آ نیمون کنگ ءُ برےیک جاھے ءِ گوشگ ءَ بیتگ اَنت۔ برے گوشگ بیتگ کہ گڈانی زندان ءَ بندیگ اَنت۔ مارا ھمے گوشگ بیت کہ مئے گھاراں کجام میارباری کرتگ ءُآکجام میارباری ءِ بنیاد ءَ زندان ءَ بندیگ اَنت۔
سیما بلوچ ءَ گوں انسانی ھکانی دارھاں لوٹ کرتگ ءُ گوشتگ کہ پہ مئے مردمانی آجوئی ءَ گامگیج بہ زور اَنت۔ ما گوں ھب انتزامیہ ءَ لوٹ کن ایں کہ مئے مردماں یل بہ کنت۔
