بلوچ یکجھتی کمیٹی ءِ سروک سمی دین ءَ وتی شنگ کرتگیں درشانے ءَ گوشتگ کہ زی بلوچ یکجھتی کمیٹی ءِ نیمگ ءَ ھب چوکی ءَ زیشان زھیر ءِ درکانودی کوش ءِ بگیری ءَ لسبیلہ پریس کلب ءِ دیم ءَ یک پرایمنیں زھرشانی روانکے ءِ کشگ ءِ جار جنگ بیتگ اَت ۔ بلے پولیس ءُ انتزامیہ ءَ آیان ءَ زھرشانی کنگ ءِ موکل نہ داتگ۔ وھدے کہ پُرایمنیں زھرشانی کنوکاں وتی زھرشانی شھدگ ءِ سر ءَ بندات کرتگ اود ءَ ھم پولیس کارمند اتکگ اَنت ءُ زوراکی کرتگ ءُ زھرشانی کنوکانی سر ءَ بیڑ برتگ۔
آئی گوشتگ کہ ھمے میان ءَ چار جنین ءُ یک مردینے دزگیر کرتگ۔ دزگیری ءِ وھد ءَ زھرشانی کنوک گر ءُ چیل بیتگ اَنت اود ءَ پولیس ءَ ھوار سادہ پوشاکیں کارمنداں تیرگواری ھم کرتگ ءُ باززھرشانی کنوک آزار داتگ ۔
سمی دین ءَ گوشتگ کہ بیست ءُ چار ادار ءِ گوزگ ءَ پد ھم گوں دزگیر کرتگیں مردماں نہ کھول ءُ نہ وکیلاں گندُک ءَ اش تگ اَنت۔ ءُ پولیس آیانی بندیگ جاہ ءِ بابت ءَ ھم سرپدی نہ دیگ ءَ اِنت۔ داں انوں مردمانی بگیری ءَ نہ ایپ آئی آر کرتگ ءُ نہ کہ دگہ کیس دیم ءَ آتکگ۔
سمی دین ءَ گوشتگ کہ چار جنیناں ھوار پنچ مردمانی ابید چہ کانودی نیمون ءَ زندان ءَ بند کنگ نہ تھنا دیاستی ادارھانی ترس ءَ پدر کنت، بلکیں راھبند ءُ کانود ءُ گپ ءِ آجوئی ءِ سر ءَ تچکیں ارشے۔
سمی دین ءَ گوشتگ کہ بلوچ یکجھتی کمیٹی ءِ پُرایمنیں زھرشانیانی سر ءَ ریاست ءِ بیڑ برگ ءُزوراکی کنگ ھمے راستی ءَ پدر کنت کہ ریاست وت یک پرایمنیں زرمبشتے ءَ ترسگ ءَ اِنت۔ یک انچیں زرمبشتے کہ زوراکی ءِ بگیری ءَ توار چست کنگ ءَ اِنت۔ ایشی دارگ ءِ جھد وت زوراکی ءِ منّگ اِنت۔
