شال: وائس پار مسنگ پرسنز ( وی بی ایم پی ) ءِ سرکماش نسرالله بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که ما یک گلے ءِ پارست ءَ گوں بلوچ سلاه بندیں گل ءَ لوٹ کن ایں که آ مردمگری ءِ بنیاد ءَ اسسٹنٹ کمشنر مھمد ھنیپ نورزئی ءَ زوت یل به کن اَنت دانکه آئی کھول ءِ گرانیں سسائی جنجال ءُ پریشانی ھلاس به بنت.
آئی ءَ گوشتگ که مھمد ھنیپ یک سرکاری سروگانے ءَ اَبید یک کھولے ءِ والینوک اِنت که آئی ءِ بندیگی ءِ سوب ءَ آئی آزیز ءُ مردم سکا جنجالانی دیمپان اَنت ، انسانی راھبند ءُ بلوچی دودانی رد ءَ ھنیپ نورزئی ءِ یل کنگ ءِ بابت ءَ دلجمی دیگ به بیت دانکه آئی کھول چه پریشانی ءَ به رک ایت ءُ اے په دمگ ءَ یک شریں کلوھے بیت۔
