شال: 13 نومبر 2022 ءَ پاکستانی لشکر ءِ دست ءَ زور بیگواہ کنگ بوتگیں ورنا سلمان ءِ گھار سادیہ ءَ وتی برات ءِ آجوئی ءِ لوٹ کرتگ۔
آئی ءَ ماں چاگردی سانکدر ایکس ءَ نبشتگ کہ منی برات سلمان گوستگیں یک سالے بیت کہ ریاستی ادارھانی دست ءَ بیگواہ کنگ بوتگ۔
سادیہ ءَ گوشتگ کہ اگاں منی برات ءِ سر ءَ میارباری ءِ چونیں بھتامے ھست گڑا آمیدگس ءَ پیش کنگ ءُ سزا دیگ بہ بیت۔ اگاں بے میار اِنت گڑا یل کنگ ءُ مئے کھول چہ رنجاں آجو کنگ بہ بیت۔
یات بہ بہ اِت کہ سلمان ءَ ھوار اے کھول ءِ تہ ءَ سے مردم پاکستانی لشکر ءِ دست ءَ زور بیگواہ کنگ بوتگ۔ آسپ ءُ رشید 2018 ءَ آوار جنگ بوتگ اَنت کہ انگت بیگواہ اَنت۔
