شال: وائس پار بلوچ مسنگ پرسنز (وی بی ایم پی) ءِ سرکماش نسراللہ بلوچ ءَ وتی شنگ کرتگیں درشانے ءَ گوشتگ کہ نسیدہ بلوچ ءَ وتی برات سگیر ء گلام کادر میروانی ءُ ناکوزتک اکرار ء جنگیان ءِ زوربیگواھی ءِ کیس گل ءِ کر ءَ یاداشت کرتگ۔
آئی گوشتگ کہ نسیدہ ءِ گوشگ اِنت منی برات سگیر ء گلام کادر میروانی ءُ ناکوزتک اکرار ء جنگیان ءَ پاکستانی پوج ءَ یازدہ جون ءِ شپ ءَ چہ اورماڑہ چوکی ءَ ھما وھد ءَ آوار جتگ ءُ بیگواہ کرتگ کہ آ وتی گس ءَ پیداک بوتگ اَنت۔
آئی گوشتگ کہ گوں انتزامیہ ءَ وتی برات ءُ ناکوزتک ءِ پاکستانی پوج ءِ دست ءَ درکانودی آوار جنگ ءِ بابت ءَ رھوت کرتگ۔ بلے انتزامیہ ءِ نیمگ ءَ آیانی بابت ءَ مارا ھچ وڑیں سرپدی دیگ نہ بوتگ۔ چہ ایشی سوب ءَ مئے کھول سک ءَ جنجالانی دیمپان انت۔
نسیدہ بلوچ ءَ گوشتگ کہ منی برات سگیر اھمد ءَ اولی رند ءَ 20 نومبر 2017 ءَ چہ کراچی ءَ پاکستانی پوج ءُ چیریں ادارھانی کارمنداں زوربیگواہ کرتگ ات ءُ یک سالے ءِ زوریں بیگواھی ءَ پد یل کنگ بوتگ اَت۔
آئی گوشتگ کہ منی برات سگیر اھمد چہ کراچی زانشجاہ ءَ وتی وانگ ءِ سرجم کنگ ءَ پد سرگودھا زانشجاہ ءَ ماسٹر ڈگری گپتگ۔ ایشی ءَ پد آ مردمانی کمک کنگ ءَ وتی بنکی ھنکین آواران ءَ آتکگ۔ بلے آئی ءَ وانندھی ءَ ابید نوکری دیگ نہ بوتگ۔ آسراتی ءِ نہ بوگ ءِ سوب ءَ آ لاچار بوتگ کہ تُربَت ءَ شُتگ ءُ وتی ناکوزتک اکرار ءِ ھواری ءَ اود ءَ تیل ءِ ڈپو ءَ کار ءَ بوتگ۔
نسراللہ ءَ گوشتگ کہ چہ گل ءِ نیمگ ءَ نسیدہ بلوچ ءَ دلجمی دیگ بوتگ کہ آئی برات ءُ ناکوزتک ءِ کیس ءَ پہ بیگواھیں مردماں جوڑ کرتگیں کمیشن ءُ سرکار ءَ سر کنت ءُ پہ آیانی آجوئی ءَ ھر نیمگ ءَ توار چست کنگ بیت۔
وی بی ایم پی ءِ سرکماش نسراللہ بلوچ ءَ چہ سرکار ءُ ڈیھ ءِ ادارھانی سروکاں لوٹ کرتگ کہ سگیر اھمد ءُ اکرار ءِ کھول ءَ ڈیھ ءِ راھبند ءِ رد ءَ انساپ دیگ ءَ وتی کرد ءَ پیلو بہ کنت ءُ کھول ءَ چہ اے آزاراں در بہ کن اَنت۔
