بلوچ یکجھتی کمیٹی ءِ جارکش ءَ گوشتگ کہ 29 جون ءَ پنجگور ءَ چہ دہ سال ءَ زوربیگواھیں زھیر اھمد ءِ بچک ءُ بلوچ یکجھتی کمیٹی پَنجگُور ھنکین ءِ آرگنائزنگ کمیٹی ءِ باسک زیشان زھیر ءَپاکستانی پوج ءِ جوڑ کرتگیں کشندہ ٹولی ءِ کارمنداں چہ پٹبال چاراہ ءَ آوار جتگ۔
آئی گوشتگ کہ زیشان ءِ زوربیگواھی ءَ پد زوت آئی کھول ءُ ھندی مردمانی نیمگ ءَ پنجگُور ءَ زھرشانی کنگ بیتگ کہ نندانک سرجمیں شپ ءَ برجاہ بوتگ۔ مرچی 30 جون ءِ سھب ءِ ادار نھ ءَ آئی کھول ءَ زیشان ءِ لاش سر کنگ بوتگ۔
آئی گوشتگ کہ 21 سالی ئیں زیشان زھیر یک پُرکاریں سْیاسی ءُ انسانی ھکانی کارکنے بوتگ کہ آ وتی پت زھیر اھمد ءَ ھوار سرجمیں بلوچستان ءَ زوربیگواھی ءُ بلوچ چکچینی ءِ بگیری ءَ توار چست کنگ ءَ بوتگ۔ آئی ءَ ریاستی زوراکی، آزاردھی ءُ درکانودی کاروائیانی بگیری ءَ زانت ءُ سْیاسی سرپدی بیتگ۔
آئی گوشتگ کہ زیشان زھیر ءِ درکانودی کوش پاکستانی پوج ءُ آئی کمکارانی دست ءَ بلوچ چکچینی ءُ بلوچستان ءَ گوستگیں ھپت دھکاں برجاھیں ریاستی زوراکی ءِ درچ اِنت۔ اود ءَ ھر روچ بلوچ شھری زوربیگواہ کنگ ءُ آیانی لاش چگل دیگ بوگ ءَ اَنت۔ ریاست ءِ زوراکی وتی گڈی آسر ءَ سر بوتگ ءُ کانود ءِ نزام نیست۔
جارکش ءَ گوشتگ کہ بی وائی سی شھید زیشان زھیر ءِ درکانودی کوش ءِ بگیری ءَ سرجمیں بلوچستان ءَ زھرشانی کنت ءُ آئی یات ءَ مراگش برجم دارگ ءِ جار ءَ جنت۔ درسیں ھنکیناں گوشگ بیت کہ آ زوت زھرشانی پروگرام ءُ یاتگاری مراگشانی چن ءُ لانچ ءَ بہ کن اَنت۔باندا رسانکدر ءَ یک کمپینے ھم برجم دارگ بیت۔
