زور بیگواھیں بلوچ سروک استاد واھد کمبر ءِ جنک شاری واھد کمبر ءَ وتی شنگ کرتگیں درشانے ءَ گوشتگ کہ واھد کمبر ءِ زندگی یک جھدے ءِ داستان اِنت۔ آئی جھد چہ ورنائی ءَ بندات کرتگ ءُ داں پیری ءَ ھما جوزگ برجاہ داشتگ۔ آ نہ تیوک ءَ یک مردمے بلکیں یک زرمبشتے۔ یک انچیں لیکھے کہ آئی بلوچستان ءَ ریاست ءِ زوراکی، ناھکی ءُ لٹ ءُ پلانی بگیری ءَ توار چست کرتگ۔
آئی ءَ گوشتگ کہ اے بگیریاں ریاست ءِ زوراکیانی چنچو دروشم دیم ءَ آرتگ۔ بلے آئی چہ درساں تچک ءُ انوگیں درور آئی ھمے کیس اِنت کہ اے وھد ءَ بلوچستان ءِ ھائی کورٹ ءَ ایر اِنت۔ اے کیس ءَ واھد کمبر ءِ آمیدگس ءَ پیش نہ کنگ ءُ انساپ دیگ ءِ راہ ءِ دیم ءَ درساں مستریں اڑاند وت ریاست ءِ بے تواری ءُ پہ زانت وھد دیگ اِنت۔
شاری واھد کمبر ءَ گوشتگ کہ پہ واھد کمبر ءِ کیس ءَ آمیدگس ءَ چہ سرکار ءَ یک مزنیں رپورٹے لوٹ اتگ کہ انگت ءَ پیش کنگ نہ بیتگ۔ چہ اے رپورٹ ءِ نیاھگ ءِ سوب ءَ کیس یکشل ءَ دارگ بوگ ءَ اِنت۔ انچوش گمان کنگ بیت کہ ریاست پہ زانت اے جیڑہ ءَ دراجکش کنگ لوٹ ایت دانکہ واھد کمبر ءِ جیڑہ ءَ بدار ایت یا وھد ءِ ھساب ءَ چیر بہ ترین ایت۔ بلے واھد کمبر بلوچ راج ءِ ھما ھستی اِنت کہ آئی ءَ راج ءُ کھول بیھال کرت نہ کنت۔
