بلوچ نیشنل موومنٹ ءِ بنجاھی سروک ڈاکٹر دین مھمد ءِزوریں بیگواھی ءِ شانزدھمی سالروچ ءِ درگت ءَ جرمنی ءِ بنجاھی شھر برلن ءَ زھرشانی کنگ بیتگ۔ زھرشانی ءَ بی این ایمءِ باسک، جنین ءُ زھگاں بازیں کچے ءَ بھر زرتگ۔
زھرشانی کنوکیں مردماں زوربیگواھیں مردمانی اکس دست ءَ بیتگ اَنت کہ آیاں درسیں بیگواھیں مردمانی آجوئی ءُ بلوچستان ءَ ریاستی زوراکیانی بگیری ءَ اوگام جتگ ءُ انساپ ءِ لوٹ کرتگ۔
زھرشانی ءِ میان ءَ انگیریزی زبان ءَ پنتاک بھر ءُ بانگ کنگ بیتگ کہ پنتاک ءَ ڈاکٹر دین مھمد ءَ ھوار بلوچستان ءَ زوریں بیگواھیانی جاور پیش کنگ بیتگ اَنت۔
آیاں تران کرتگءُ گوشتگ کہ ما مرچی پہ پارٹی ءِ بنجاھی سروک ڈاکٹر دین مھمد ءِ زوریں بیگواھی ءِ شانزدھمی سالروچ ءِ درگت ءَ اد ءَ زھرشانی کنگ ءَ ایں، بلے گپ ایش اِنت کہ ما ڈاکٹر دین مھمد ءَ ھوار پہ درسیں بیگواھیں مردمانی آجوئی ءَ لوٹ کن ایں ءُ بلوچستان ءَ پاکستان ریاست ءِ نیمگءَ برجاھیں زوراکیانی دارگ ءِ لوٹءَ کن ایں۔ مئے ادا آھگ ءِ مول گوں وتی بلوچ راج ءَ ھم سنتی کنگ اِنت ءُگوں سانمندیں مردماں ھم سنتی کنگ مئے سر ءَ پرز اِنت گڑا باید اِنت کہ ما وتی زمہ واریاں پیلو بہ کن ایں۔
