نیشنل ڈیموکریٹک پارٹی ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ پارٹی ءِ بنجاھی سروک سنگت گنی بلوچ ءَ ریاستی اداراھاں 25 مئی 2025 ءَ چہ ھزدار ءَ الکادری ھوٹل ءِ نزیک ءَآوار جتگ ءُ بیگواہ کرتگ۔ آئی زوربیگواھی ءَ یک ماھے سرجم بوتگ کہ انگت ءَ نہ آئی بابت ءَ سرپدی دیگ بوتگ ءُ نہ چہ سرکار ءِ نیمگ ءَ آئی دزگیری منگ بوتگ۔ اے کار نہ کہ تیوک ءَ درکانودی ءُ در انسانی انت بلکیں جھانی انسانی ھکانی تچک ءَ بگیری اِنت۔
آئی گوشتگ کہ چہ زوربیگواھی ءِ سانمند بیتگیں مردم کانود ءِ پھازداری ءَ زبھر کنگ ءُ
آیاں سرجم ءَ بے ستک ءُ آزار دھیں جاورانی تیلانک دیگ بنت۔ اے کارچاگردی سزا ءِ بھرے کہ اے پہ گنی بلوچ ءِ کھول، سْیاسی کارکن، نودربر ءُ کتاب دوستانی دل ءَ یک ٹوھیں ٹپے ایر کنت۔ بلوچستان ءَ زوریں بیگواھیانی درچ باز ترسناکیں ھدے ءَ گیش بوتگ۔ ھمے سال ءَ ایشی تہ ءَ انگت ءَ گیشی آتکگ کہ انسانی ھکانی تباھی ءِ جاوراں پدر کنت۔
آئی گوشتگ کہ نیشنل ڈیموکریٹک پارٹی چہ سرکار ءُ ریاستی ادارھاں لوٹ کنت کہ گنی بلوچ ءَ زوت دیم ءَ بْیار اَنت۔ اگاں آئی سر ءَ چونیں کانودی بھتامے ھست گڑا آ راھبند ءُ کانود ءِ رد ءَ آمیدگس ءَ پیش کنگ بہ بیت دانکہ آئی ءَ سپائی دیگ ءُ راھبند ءِ رد ءَ ھک دیگ بہ بیت۔ ایشی ءَ ھوار گل اے گپ ءِ سر ءَ ھم زور دنت کہ بلوچستان ءَ زوریں بیگواھیانی در انسانی رواج ءَ زوت بہ بند بہ کنت۔ چی ءَ کہ اے نہ تیوک ءَ پاکستان ءِ راھبند بلکیں جھانی انسانی ھکانی کولانی بگیری اِنت۔
جارکش ءَ گوشتگ کہ مرچی 25 جون 2025 ءَ گنی بلوچ ءِ بیگواھی ءَ یک ماھے سرجم بوگ ءَ این ڈی پی کی نیمگ ءَ ایکس ءَ کمپینے برجم دارگ بیت۔ گوں درسیں سْیاسی کارکن، انسانی ھکانی کارکن، اھوالکار، دانشور ءُ نودربراں بھر زورگ ءِ لوٹ ءَ کن ایں۔ گنی بلوچ ءَ ھوار درسیں زوربیگواھیں مردمانی آجوئی ءَ توار چست کنگ زانتکاریں مردمانی سر ءَ زمہ واری بیت۔
