ایران ءُ اسرائیل ءِ میان ءَ دوازدہ روچانی جنگ ءَ پد یک جنگ بندی ءِ جھدے دیم ءَ اتکگ، امریکہ ءِ پیسری سدر ڈونلڈ ٹرمپ ءَ 24 جون 2025 ءَ جنگ بندی ءِ جار جتگ اَت کہ دوئیں ڈیھاں شش ادارانی میان ءَ جنگ بندی ءِ سر ءَ تپاک کرتگ اَت۔ پد ءَ ھم چہ ایران ءُ اسرائیل ءِ نیمگ ءَ منگ ءِ گپ دیم ءَ نہ یتکگ ءُ دوئینانی نیمگ ءَ یکے دومی ءِ سر ءَ کم کم ءَ اُرش برجاہ بیتگ اَنت۔ گندگ ءَ جار ءَ پد دمگ ءَ جیڑہ کم بیتگ، ایشی آسر ءَ میان استمانی منڈیاں تیل ءِ نھاد کم چہ کم چاردہ درسد کم بیتگ۔
ایران ءِ گوشگ اِنت کہ اسرائیل ءِ ارشاں شش سد ءَ گیش مردم مرتگ، ایران ءِ وزیر سھت ءِ نیمگ ءَ شنگ بیتگیں یک بیانے ءَ گوشگ بیتگ کہ 13 جون ءَ داں انوں اسرائیل ءِ ارشاں 606 مردم مرتگ۔ پنچ ھزار ءَ گیش ٹپی بیتگ۔
ایرانی دری کارانی وزیر ءِ گوشگ اِنت کہ ایران ءَ گوستگیں بیست ءُ چار ادارانی میان ءَ گنتریں ارش بیتگ کہ ایشی آسر ءَ 107 مردم مرتگ۔
ایران ءُ اسرائیل ءِ جنگ بندی ءِ بابت ءَ لھتیں ڈلگیں ھال اے وڑ ءَ اِنت۔
امریکی سدر ڈونلڈ ٹرمپ ءَ رسانکدر ءَ پوسٹ کرتگ ءُ گوشتگ کہ ایران ءُ اسرائیل ءِ میان ءَ جنگ بندی کنگ بیتگ۔
چہ امریکی سدر ءِ نیمگ ءَ شنگ بیتگیں درشان ءَ یک ادارے ءَ پد اسرائیل ءَ گوشتگ کہ آ امریکہ ءِ جنگ بندی ءِ لوٹ ءِ سر ءَ رازیگ ایں۔ ایران ءَ پیسر ءَ گوشتگ اَت کہ اگاں اسرائیل ءَ اے وڑ کرت گڑا اُرشاں بند کن ایں۔
چہ ایشی ءَ پد اسرائیلی پوج ءِ نیمگ ءَ شنگ بیتگیں درشانے ءَ ایران ءِ نیمگ ءَ آس داتگیں میزائل نشان داتگ اَنت ءُ آئی زرباری اسرائیل ءِ بُرزا داشتگ اَنت۔
ایران ءَ میزائل ءِ آس دیگ ءِ بھتام رد کرتگ اَنت۔ بلے اسرائیلی پوج ءِ گوشگ اِنت کہ اسرائیل شریں وڑے ءَ اے ارش ءِ پسو ءَ دنت۔
جنگ بندی ءِ بندات ءَ پیش دوئیں نیمگاں سرجمیں شپ ءَ گولا آس دیگ بیتگ۔
ایران ءِ سرکاری رسانکدر ءِ گوشگ اِنت کہ اسرائیل ءِ نیمگ ءَ آس داتگیں میزائلاں بنجاھی شھر ءُ آدگہ شھر نشانگ کنگ بیتگ اَنت۔ ایشی آسر ءَ کم چہ کم نُھ مردم مرتگ کہ آیانی تہ ءَ یک ایرانی جوھری سائنسدانے ھم گوں اِنت۔
ارشانی آسر ءَ اسرائیل ءِ بیرشیبا ءَ کم چہ کم چار مردم مرتگ ءُ 22 ٹپی بیتگ۔
