بلوچ یکجھتی کمیٹی ءِ سروک سمی دین ءَ راشدھسین ءِ زوریں بیگواھی ءِ درگت ءَ ماں چاگردی رسانکدر ءَ وتی درشانے ءَ گوشتگ کہ راشد ھسین ءِ مات چنچو سال اِنت کہ پہ وتی زھگ ءِ آجوئی یا دیم ءَ آرگ ءَ زھرشانی کنگ ءَ اِنت۔ آئی چہ اسلام آباد ءَ کراچی ءُ شال ءَ زھرشانی کنگ ءَ گندگ بیت کہ اود ءَ پہ وتی آزیزانی آجوئی ءَ گوں آدگہ ماتاں ھوار اِنت۔
آئی ءَ گوشتگ کہ راشد ھسین ءِ چہ دبئی ءَ زوریں بیگواھی ءُ داں پاکستان ءَ واتر آرگ ءِ درسیں سبوت ھست اَنت۔ راشد ھسین ءِ دزگیری ءِ ھال رسانکدر ءَ شنگ بیتگ، بلے چہ ھما روچ ءَ داں مرچی راشد ھسین ءِ مات ءُ آئی کھول ءَ یکبرے گوشگ نہ بیتگ کہ راشد ھسین کج ءَ اِنت ءُ کئی بندیگ اِنت، آئی ءِ سر ءَ چونیں کیس ھست۔
سمی دین ءَ گوشتگ کہ اے بنکی ھکانی ھما لگتمالی اِنت کہ اود ءَ نہ رسانکدر ءَ گپ بیت ءُ نہ آمیدگس دلگوش دنت، زھرشانی کنگ ءِ سر ءَ ریاستی زوراکیانی دیمپانی کنگ بیت۔
آئی ءَ گوشتگ کہ اے سرکاراں پہ بلوچاں ھما درسیں درانی بند کنگ ءِ جھد کرتگ کہ اود ءَ بلوچ پر ایمن بہ بیت ءُ وتی گپ ءَ بہ کنت۔
