بلوچ راجدوستیں سروک جاوید مینگل ءَ وتی شنگ کرتگیں درشانے ءَ گوشتگ کہ پہ میان استمانی سیاستءَ بازیں ڈیھانی دو دیمیں سیاست نوں پہ میان استمانی ایمنی ءَ مزنیں جیڑہ اَنت۔ اگاں گپ جوھری سلاھانی چہ تالانی دارگ ءُ ریاستی سروکی ءَبیوکیں ناشرکاریانی گِر ءُ دار بہ بیت اے گامگیج ءِ سرءَ پاکستانءِ جیڑہ تچک اَنت۔
آئیءَ گوشتگ کہ پاکستان ءِ گوں ناشرکاریں ٹولیاں رھوت کنگ ءُ گون جوھری سلاھاں آئی گوست بژنیگ اِنت۔ گوں ایشی ایران، لیبیا ءُ زرباری کوریا ءَ جوھری ٹیکنالوجی ھوار اِنت۔ چہ ایشی ءَ ابید روکپتی ڈیھ ءُ گوں آیاں ھوار آدگرانی پلہ مرزی گوں اِنت ءُ پاکستان بلوچستان ءَ انسانی ھکاں لگتمال کنگ ءَ اِنت، چوش کہ زوریں بیگواھی ءُدرکانودی کوش اِنت، اے بابت ءَ جھان بے تواراِنت اے بلوچ ءِ چکچینی گوشگ بیت۔
میر جاوید مینگل ءَ گوشتگ کہ پاکستانی پوج ءِ گِر ءُ دار گیشتر پنجاپ ءِ مردمانی دست ءَ اِنت، آ گیشتردو دیمی دری شونداتانی سر ءَ کار کنت۔ اے امریکا، چین، روس ءُ ایران ءِ گون ءَ گھتریں نزیکی کنگ ءِ جھد ء کنت۔ ھمے سوب ءَ جیڑہ ودی بیت، چوش کہ آئی درسرکاری سروک گوں ایران ءَ پلہ مرزی ءَ پیش دار اَنت ءُ آئی پوج گوں روکپتی ڈیھاں نزیکی کنت۔ پہ میان استمانی باپاری ءُ سلامتی ءَ اے دمگ ءِ گیش بیوکیں جنجالاں جھان ءِ دلگوش وتی نیمگ ءَ کرتگ۔ اے جنگ تھنا ھندی جیڑھے نہ اِنت ایشی باندات داں باز سالاں دمگ ءِ ایمنی ءَ سانمند کنت۔
