ایران ءَ مرچی سھب ءَ یکبرے پد ءَ اسرائیل ءِ زرباری شھر، بیرشیبا ءِ سر ءَ بیلیسٹک میزائلانی گون ءَ ارش کرتگ، ایشی آسر ءَ دمگ ءَ بازیں کچے ءَ مالی تاوان بیتگ ءُ بازیں گاڑی ستکگ اَنت۔
اسرائیلی رسانکدر ءِ رد ءَ اے ارش مرچی آدینگءِ سھب ءَ کنگ بیتگ۔ میزائل یک ماڑی یے ءِ سر ءَ کپتگ چہ ایشی آسر ءَ نزیکیں ماڑی، گاڑی ءُ آدگہ سامان تاوان بیتگ اَنت۔ انگت ءَ دگہ جانی تاوان ءِ ھال نسیت بلے مالی تاوان باز بیتگ۔
ایمرجنسی سروس میگن ڈیوڈایڈم ءِ گوشگ اِنت کہ ارش ءَ پد زوت کمکی ٹولی ھمے جاہ ءَ سر بیتگ ءُ آس ءِ کشگ اِش بندات کرتگ۔ چہ اے ارش ءَ یک روچے پیش ایران ءِ یک میزائلے گوں بیر شیبا ءِ نادراھجاہ ءَ لگ اتگ چہ ایشی ءَ ھپتاد ءَ گیش مردم ٹپی بیتگ اَنت۔
اسرائیلی پوج ءَ وتی شنگ کرتگیں درشانے ءَ گوشتگ کہ چہ انٹرسیپٹر دپائی نزام ءِ ھرابی ءِ سوب ءَ ایرانی میزائل ءِ دارگ ءَ بے سوب بیتگ ایں۔
