تربت: بلوچ یکجھتی کمیٹی ءِ نیمگ ءَ بی وائی سی ءِ بنجاھی سروک ڈاکٹر ماہ رنگ بلوچ ءَ ھوار آدگہ بنجاھی سروک ءُ کارکنانی ناھکیں بندیگی ءِبگیری ءَ سے روچی زھرشانی نندانک مرچی سھبءَ بندات کنگ بیتگ۔
مرچی سھب ءَ تربت پولیس ءَ پہ زھرشانی ءِ دارگ ءَ دزمانجنی کرتگ بلے بی وائی سی ءِ سروکاں گوں ایمنی ءَ وتی زھرشانی نندانک بندات کرتگ۔ زھرشانی ءَ بی وائی سی کیچ ءِ سروک، سول سوسائٹی کیچ ءِ سروک، وکیل ءُ آدگہ سیاسی ءُ چاگردی کارکن، جنین ءُ زھگاں بھر زرتگ ءُ نشتگ اَنت۔
زھرشانی نندانک ءَ بی وائی سی ءِ بندییگیں سروکانی اکس، بینر ءُ پلے کارڈ جنگ بیتگ اَنت کہ پلے کارڈانی سر ءَ جتائیں اوگام نبشتہ بیتگ۔
زھرشانی ءَنشتگیں مردمانی گوشگ اِنت کہ بی وائی سی کیچ ھنکین ءِاے سے روچی زھرشانی ءِ مول ھمیش اِنت کہ بی وائی سی ءِ بنجاھی سروک کہ ریاستی زندان ءَ بندیگ اَنت آ یل کنگ بہ بنت۔ ما ھمے انگریز ءِ جوڑ کرتگیں سیاھیں کانود تھری ایم پی او ءَ نہ من ایں۔
چہ زھرشانی نندانک ءَ کیچ سول سوسائٹی ءِ سروک گلزار دوست ءَ بی وائی سی ءِ سے روچی زھرشانی ءِ پلہ مرزی ءِ جار جتگ ءُ گوشتگ کہ سرکار بی وائی سی ءِ بنجاھی سروک ڈاکٹر ماہ رنگ بلوچ، سنگت اللہ شاہ جی بلوچ، بیبرگ بلوچ، گلزادی بلوچءُبیبو بلوچ ءَ ھوار چنچو کہ آدگہ باسک یا ھما مردم کہ آ بی وائی سی ءِ نام ءَ آوار جنگ بیتگ اَنت درس زوت یل کنگ بہ بنت۔
زھرشانی کنوکیں مردمانی گوشگ اِنت کہ بی وائی سی ءِ سروک زوریں بیگواھی، ریاستی زوراکی ءُ پہ بلوچ ءِ ھکاں توار چست کنگ ءِ بنیاد ءَ زندانی کنگ بیتگ اَنت باید ھمیش اِنت کہ پارلیمانی پارٹیاں پہ آیانی آجوئی ءَ توار چست کنگ ءَ جھد بہ کرتیں۔ چہ آیانی بے تواری ءَ ھمے زانگ بیت کہ آ چہ سرکار ءَ لب ءَ دلمانگ اَنت۔
