بلوچ یکجھتی کمیٹی ءِ سروک ڈاکٹر ماہ رنگ بلوچ ءِ گھار نادیہ بلوچ دوشمبے ءِ روچ ءَھدہ جیل ءَ پہ وتی گھار ءِ چارگ ءُ آئی وکیل نامگ ءِ دز رند کنگ ءَ شتگ، گڑا زندان ءِ سپرنٹنڈنٹ ھمید اللہ پیچی ءَ نہ تھنا وکیل نامگ ءِ دز رند گرگ نہ اشتگ بلکیں گوں آئی ءَ ترندی ءَ گپ جتگ ءُ بیھار داتگ۔
نادیہ بلوچ ءِ گوشگ اِنت کہ آ سھب ءِ دہ ءَ زندان ءَ شتگ ڈاکٹر ماہ رنگ بلوچ ءَ وکیل نامگ ءِ سر ءَ دز رند داتگ ءُ تیوک ءَ سپرنٹنڈنٹ ءِ کار پشت کپتگ دانکہ آ کانودی کاروائی ءَ سرجم بہ کنت، بلے سپرنٹنڈنٹ ءَ پہ زانت وھد گوازینتگ ءُ نیمون کرتگ، گڈی ءَ تچک ءَ گوشتگ کہ آ اے دز رند ءِ سر ءَ ٹپہ نہ جنت۔
آئی ءِ گوشگ اِنت کہ زاندان ءِ انتزامیہ گوں آئی ءَ ترندی ءَ پیش بیتگ ءُ مدام بیھار داتگ ءُ بازیں کچے ءَ پولیس لوٹائینگ بیتگ ءُ مئے چپ ءُ چاگرد ءَ اوشتارینگ بیتگ اَنت ءُ مئے موبائلانی پلگ ءِ جھد کرتگ۔ اے درسیں گامگیج پہ مئے بے توار کنگ ءُ کانودی ھک ءِ پلگ ءَ یک مزنیں جھدے کرتگ۔
نادیہ بلوچ ءِ گوشگ اِنت کہ سپرنٹنڈ نٹ پہ ریاستی ادارھانی رازیگ کنگ ءَ نہ تیوک ءَ ڈاکٹر ماہ رنگ بلوچ ءُ بی وائی سی ءِ آدگہ سروکانی گون ءَ زندان ءَ زوراکی کنگ ءَ اِنت بلکیں آیانی کھولاں ھم ترندیں بیھار دیگ ءَ اِنت۔
آئی ءِ گوشگ اِنت کہ مارا گوشگ بیتگ اگاں شما بے توار نہ بوت اِت گڑآ ایشی آسر ءَ گند اِت۔
