چہ ڈیرہ بگٹی ءِ ھند سوئی ءَ دوشی پاکستانی پوج ءُ سی ٹی ڈی ءَ بیڑ برتگ ءُ سے مردم آوار جنگ ءَ پد بیگواہ کرتگ۔
زرمبش جھگیر ءِ رد ءَ بیگواھیں مردمانی نام مھران ء سائیں بکش بگٹی ، گل گوھر ء مھمد امین بگٹی ءُ مھردل ء مھمد امین بگٹی اِنت۔ پاکستانی پوج ءُ سی ٹی ڈی ءِ کارمنداں زی سوئی ءِ جتا جتائیں ھنداں بیڑ برتگ ءُ دہ مردم آوار جتگ ءُ بیگواہ کرتگ، چہ آیاں ھمے سے مردم پجارگ بیتگ اَنت۔
انچوش گوشگ بوگ ءَ اِنت کہ مھران بگٹی ءُ گل گوھر بگٹی دریجن کالونی ءِ جاہ منند اَنت ءُ مھردل بگٹی پھونگ کالونی ءِ جاہ منند اِنت۔ پہ آدگہ بیگواھیں مردمانی پجارگ ءَ مئے جست ءُ پرس برجاہ اِنت۔
زور بیگواھیں مردمانی کھولاں چہ انسانی ھکانی ادارہ ءُ بلوچ راج ءَ لوٹ کرتگ کہ پہ مئے بیگواھیں مردمانی آجوئی ءَ توار چست بہ کن اِت۔
