تربت: پاکستانی پوج ءِ دست ءَ زور بیگواھیں لیویز کارمند گلام جان ءِ کھول ءِ نیمگ ءَ اومری کھن ءَ سی پیگ دگ ءَ مرچی شش روچ اِنت کہ زھرشانی نندانک برجاہ اِنت۔
پنچ روچ ءِ گوزگ ءَ پد ھم چہ سرکار ءِ نیمگ ءَ پہ گلام جان ءِ کھول ءِ لوٹانی منگ ءَ ھچ وڑیں دلجمیں گامگیج زورگ نہ بیتگ۔ اے وھد ءَ کسانیں زھگاں ھوار مردم بازیں کچے ءَ زھرشانی ءَ نشتگ اَنت۔ چہ دگ ءِ بند بوگ ءِ سوب ءَ مساپر ءُ گاڑی واھند سکا جنجال اَنت۔
زور بیگواھیں گلام جان ءِ کھول ءِ گوشگ اِنت دانکہ مئے زھگ یل کنگ نہ بوتگ ما وتی زھرشانی نندانک ءَ برجاہ دار ایں۔
چوش کہ گلام جان ھمے سال ءِ 26 مئی ءَ آوار جنگ ءُ بیگواہ کنگ بوتگ۔ چہ آئی کھول ءِ نیمگ ءَ 11 جون ءَ زھرشانی بندات کنگ بیتگ ءُ داں مرچی ھم برجاہ بیتگ۔
چہ زور بیگواھیں مردمانی کھولانی نیمگ ءَ پہ وتی کھولانی آجوئی ءَ زھرشانی کنگ ءَ ابید چہ پاکستانی پوج ءِ نیمگ ءَ زوریں بیگواھی ءُ دروگیں میڑاں زور بیگواھیں مردمانی کوش برجاہ اِنت۔
