بلوچ لبریشن آرمی ( بی ایل اے ) ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے ءِ سرمچاراں پنجگور ءُ زامران ءَ پنچ جتائیں اُرشاں پاکستانی پوج نشانگ کرتگ که ایشانی آسر ءَ پوج ءِ چار کارمند مرتگ ، اے اُرشاں پاکستانی پوج ءِ چاریگی کیمره تباه کرتگ اَنت ھمے وڑ ءَ بی ایل اے ءِ سرمچار سنگت ریاز پنام ءِ امان شھید بیتگ.
آئی ءَ گوشتگ که بی ایل اے ءِ سرمچاراں مرچی سھب ءِ نو ءِ نزیک ءَ زامران ءِ ھند دشتوک ، بامبلو ءَ پاکستانی پوج ءِ پیادگیں کارمند ھما وھد ءَ گوں چیر کرتگیں شورھاں نشانگ کرتگ اَنت که آ بمب پٹوکیں کارمندانی ھمراھی ءَ راھاں بمب پٹگ ءَ بیتگ اَنت ، تراک ءِ آسر ءَ زورگریں پاکستانی پوج ءِ دو کارمند جاھی مرتگ ءُ یکے سکا ٹپی بیتگ.
جارکش ءَ گوشتگ که ھمے وڑ ءَ زامران ءِ ھند زامری ءَ بی ایل اے ءِ سرمچاراں زورگریں پاکستانی پوج ءِ کارمند ھما وھد ءَ گوں چیر کرتگیں شورھاں نشانگ کرتگ اَنت که آ وتی بنجل ءِ نزیک ءَ چه واٹر سپلائی ءَ آپ زورگ ءَ بیتگ اَنت ، تراک ءِ آسر ءَ زورگریں پوج ءِ یک کارمندے جاھی مرتگ.
آئی ءَ گوشتگ که سرمچاراں 13 جون ءَ آدینگ ءَ زامران ءِ ھند ساه دیم ءَ زورگریں پاکستانی پوج ءِ نیمگ ءَ بنجل ءِ نزیک ءَ جتگیں چاریگی کیمره نشانگ کرتگ ءُ تباه کرتگ اَنت ، ھمے میان ءَ زورگریں پاکستانی پوج ءَ په سرمچارانی رندگیری ءَ کواڈ کاپٹر بال داتگ که اے ھم سرمچاراں نشانگ کرتگ ءُ جتگ۔
جارکش ءَ گوشتگ که آدینگ ءِ شپ ءَ دگه یک کاروائی یے ءَ بی ایل اے ءِ سرمچاراں پنجگور ءِ ھند چتکان ، کلم چاراه ءَ زورگریں پاکستانی پوج ءِ چوکی گوں دستی بمب ءَ نشانگ کرتگ ، تراک ءِ آسر ءَ کم چه کم دژمن ءِ یک کارمندے مرتگ ءُ دگه دو ٹپی بیتگ۔
آئی ءَ گوشتگ که گوستگیں روچ ءَ ساھیجی ءِ کوھاں دشت ملائی نگور ءِ دمگ ءَ بی ایل اے ءِ سرمچار ریاز پنام ءِ امان چه زورگریں پاکستانی پوج ءِ نیمگ ءَ چیر کرتگیں تراکناکیں شورھانی تراک ءِ آسر ءَ شھید بیتگ ، اے ویل ھما وھد ءَ بیتگ که سنگت امان گل ءِ کارے ءِ درچ ءَ سپر ءَ بیتگ۔
جارکش ءَ گوشتگ که سنگت ریاز پنام ءِ امان ء کادربکش کیچ ءِ ھند دشت شولیگ ءِ جاه منند اَت ، دلیری ءُ جپاکشی ءِ چیدگ سنگت ریاز 2016 ءَ راجی ایردستی ءِ بگیری ءَ سلاه بندیں جھد ءَ هوار بیتگ ، آ دشت، مند ، تمپ ءُ زامران ءِ سنگراں دیمونی ءَ دیگ ءَ بیتگ ، آئی ءَ باز وھد ءَ ھاسیں جاھاں وتی کرد پیش کرتگ ءُ گوں کارانی سوبمندی ءَ ھمگرنچ بیتگ۔
آئی ءَ گوشتگ که شھید سنگت ریاز ءَ براس ءِ کاروائیاں ھم وتی کرد پیلو کرتگ اَنت ، پروری 2020 ءَ دشت ءِ ھند درچکور ءَ براس ءِ ” آپریشن آسریچ ” ءَ زورگریں پاکستانی پوج ءِ بنجل ءِ دسیتگ کنگ ءِ وھد ءَ جنجگاه ءَ ساڑی یبتگ که آئی ءِ پاد ءَ تیر لگ اِتگ ءُ ٹپی بیتگ.
جیھند بلوچ ءَ درشان ءِ گڈی ءَ گوشتگ که سنگت ریاز پنام ءِ امان داں گڈی وھد ءَ آجوئی ءِ لیکھ ءِ سر ءَ اوشتوک بیتگ ءُ آئی ءَ اے لیکھ ءِ سر ءَ کار کرتگ ، بی ایل اے ھمے کول ءَ کنت که زوت یا دیر شھیدانی گرانبھائیں کاروان ءَ آسر ءَ سر کنت۔
