آواران: چہ مشکے ءَ پاکستانی پوج ءِ دست ءَ زور بیگواھیں مھیب اللہ ءِ کھول ءَ چہ انسانی ھکانی ادارھاں پہ آئی آجوئی ءَ توار چست کنگءِ لوٹ کرتگ۔
آئی ءَ گوں زرمبش ءَ ھال کرتگ ءُ گوشتگ کہ مھیب اللہ ء نیک مھمد لیویز کارمندے کہ 11 جون ءِ شپ ءَ یک ءُ دو ءِ میان ءَ پاکستانی پوج ءَ مشکے گجر ءَ مئے گس ءَ بیڑ برتگ ءُ کھول ءِ دیم ءَ چہ بازیں آزار دیگ ءَ پد آوار جتگ ءُ گوں وت برتگ۔
کھول ءَ گوشتگ کہ چہ آئی بیگواھی ءَ پد ما ھمک روچ ودار کرتگ کہ مرچی باندا یل کنگ بیت پمشکا ما آئی زوریں بیگواھی ءِ ھال رسانکدر ءَ ھم شنگ نہ کرتگ ، انگت ءَ آئی ھچ وڑیں ھال نیست۔ ما پہ مھیب اللہ ءِ بابت ءَ پاکستانی پوج ءِ بنجل ءَ شتگ ءُ جست کرتگ آ مھیب اللہ ءِ آوارجنی ءَ منگ ءَ نہ اِنت۔
آئی ءَ گوشتگ کہ گوستگیں یک ءُ دو ماہ اِنت کہ زور بیگواھیں مردمانی کشگ ءُ لاشانی چگل دیگ برجاہ اِنت چہ ایشی ءَ ما سکا ترس آماچیں چوش مہ بیت کہ مئے زھگ دروگیں میڑے ءَ کشگ ءُ آئی لاش چگل دیگ بہ بیت۔
کھول ءَ گوشتگ کہ چہ ایشی پیش ھم مئے مردم مدام زوراکیانی آماچ کنگ بیتگ اَنت۔ پاکستانی پوج ءَ آوار جتگ ءُ بیگواہ کرتگ اَنت چہ بازیں آزار دیگ ءَ پد یل داتگ اَنت۔ مئے کھول ءِ بازیں مردم چہ وتی گس ءُ ھنکیناں پہ زور لڈینگ بیتگ۔
آئی ءَ گوں بلوچستان سرکار، دمگی انتزامیہ ۔ انسانی ھکانی ادارہ ءُ بلوچ راج ءَ لوٹ کرتگ کہ پہ مھیب اللہ ءِ آجوئی ءَ وتی کرد ءَ پیلو بہ کن اَنت۔ مھیب اللہ یک سرکاری نوکرے اگاں آئی سر ءَ چونیں بھتامے ھست گڑا آمیدگس ءَ پیش کنگ بہ بیت۔ بے میار اِنت گڑا زوت یل کنگ بہ بیت۔
