ایران ءُ اسرائیل ءِ میان ءَ جنگ گوں ترندیءَ برجاہ اِنت، ایران ءَ شمبے ءِ سھب ءَ اسرائیل ءِسر ءَ پنچ مزنیں میزائل ارش کرتگ۔ بازیں میزائل آس دیگ بیتگ تل ابیب ءُ ایروشلم ءَتراکانی توار اش کنگ بیتگ اَنت۔
اسرائیلی رسانکدر ءِ رد ءَ ایران ءِ نیمگ ءَ آس داتگیں میزائل تل ابیب ءِ جتائیں جاھاں کپتگ اَنت کہ گوں ایشاں اسرائیل ءِ دیمپانی وزیر ءِ ماڑی ھم ھوار اِنت۔ گش دان ءَ ھم دو ایرانی میزائل ءِ کپگ ءِ ھال اِنت۔ ارش ءِ آسر ءَ سکامزنیں آسے چست بیتگ کم چہ کم 63 مردم ٹپی بیتگ ءُ باز ماڑی تباہ بیتگ اَنت۔
اے بابت ءَ اسرائیلی پوج ءِ گوشگ اِنت کہ ایران ءِ نیمگءَ آس داتگیں میزائل برزا تباہ کنگ بیتگ اَنت۔ میزائل ارشانی پژدر ءَ شھریان ءَ مھکمیں جاھاں روگ ءِ پرمان داتگ۔
ایران ءَ اے ارش ” آپریشن وعدہ صادق سوم ” ءِ درچ لیک ءُ گوشتگ کہ اے اسرائیل ءِ پالیسانی بگیری ءَ بیرگیری کاروئی یے۔ چہ ایشی ءَ پیش ھم ایران ءِ نیمگ ءَ یک ادارے ءَ وھد وھد ءِ سر ءَ 150 داں 200 میزائل آس دیگ بیتگ۔ بنداتی ارش ءَ سد، دومی ءُ سیمی ارش ءَ پنجاہ پنجاہ میزائل آس دیگ بیتگ۔
اسرائیلی رسانکدر ءِ رد ءَ ایرانی ارشانی آسر ءَ تل ابیب ءَ یک سی ءُ دو تبکی ماڑی یے ءَ بن کرتگ ءُ ایرانی ارشاں تل ابیب ءَ پنج جاھاں تباھی کرتگ۔
پاسدار انکلاب ایران ءِ رد ءَ "آپریشن وعدہ صادق سوم ” ءَ اسرائیل ءِ باز جاہ نشانگ کرتگ اَنت ءُ اسرائیل ءِ سر ءَ 300 میزائل آس داتگ۔
ایرانی تسبم نیوز ایجنسی ءِ رپورٹ ءِ رد ءَ ایران ءَ اسرائیل ءِ دو جنگی بالگرد جتگ ءُ دور داتگ یک جنینے پائلٹے ھم دزگیر کرتگ۔ اسرائیل ءَ ایران ءِ دست ءَ جنین پائلٹ ءِ دزگیری ءِ گپ رد کرتگ۔
