بلوچ نیشنل موومنٹ ( بی این ایم ) ءِ بنجاھی سرکماش ڈاکٹر نسیم بلوچ ءَ امریکی سینٹرل کمانڈ ءِ چیپ جنرل مائیکل کریلاءِ گپانی پژدر ءَ وتی شنگ کرتگیں درشان ءَ گوشتگ کہ بلوچستانءَ دگہ ھال نیست، تھنا پاکستان ریاست ءِ برجاھیں زوراکی ءُ ناشرکاریانی ھال اَنت۔ کشگ ءُ چگل دیگ، زوریں بیگواھی ءُ بندیگیں مردمانی کوش، پاکستان پہ ترس آماچ کنگ ءَ گڈی سیمسر ءَ سر بیتگ۔
آئی ءَ گوشتگ کہ اے وھد ءَ نزورانی سر ءَ کھر گوارگ بوگ ءَ اِنت، امریکی سینٹرل کمانڈ ءِ چیپ جنرل مائیکل کریلاءِ پاکستان ءِ داھش ءِ بگیری ءَ کمک ءِ ساڑاھگ نہ تھنا نادرسی اِنت بلکیں انساپ ءُ راستی ءِ بگیری اِنت۔ اے پاکستان ریاست ءِ چہ ناشرکاریاں سانمندیں مردمانی ٹپانی سر ءَ واد پریچگ اِنت۔
ڈاکٹر نسیم بلوچ ءَ گوشتگ کہ مارا ھمے جست کنگی اِنت کہ اسامہ بن لادن کج ءَ دزکپتگ۔ نہ شام ءُ نہ اوگانستان ءَ آ ایبٹ آباد ءَ پاکستانی پوج ءِ چمانی میان ءَ ایمنیں زندے گوازینگ ءَ بیتگ ءُ مرچی ھم ما گندگ ءَ ایں کہ پاکستان گوں داھش ءَ مڑگ ءَ نہ اِنت بلکیں داھش ءُ آدگہ ناشرکاریں نیٹ ورکاں مھکمیں پناہ دیگ ءَ اِنت۔
آئی ءَ گوشتگ کہ پاکستان بلوچستان ءَ ریاستی ناشرکاری کنگ ءَ اِنت، ھمیشی چہ وتی سیمسر ءَ ڈن ھم ھوار اِنت۔ جھادی پراکسیاں آرگ ءُ سرجمیں دمگ ءَ جنجال کنگ ءَ اِنت۔
ڈاکٹر نسیم بلوچ ءَ گوشتگ کہ امریکہ ءِ پاکستان ءِ ساڑاھگ آئی وتی واک ءُ کرد ءِ سر ءَ بدیں داگے۔ ما چہ امریکہ ءَ لوٹ کن ایں کہ آ زوراک ءِ نہ نزورینانی کمک ءَ بہ کنت۔ پاکستان ءِ پلہ مرزی ناشرکاری، زوراکی ءُ ریاستی چکچینی ءِ پلہ مرزی اِنت۔
