آواران: چہ بلوچستان ءِ جتاجتائیں ھنداں پاکستانی پوج ءَ پنچ مردم آوار جتگ ءُ بیگواہ کرتگ۔
زرمبش جھگیر ءِ رد ءَ پاکستانی پوج ءَ دوشی چہ اورماڑہ ءَ سگیر اھمد ء گلام کادر ءُ اکرار ء جنگیان ھما وھد ءَ آوار جتگ ءُ بیگواہ کرتگ اَنت کہ آ چہ تربت ءَ دیم پہ ھب چوکی ءَ روگ ءَ بیتگ اَنت۔ بیگواھیں سگیر ءُ اکرار یکیں کھول ءِ مردم اَنت ءُ آواران تیر تیج ءِ جاہ منند اَنت۔
آیانی زوریں بیگواھی ءِ گپ بی این ایم ءِ انسانی ھکانی ادارہ پانک ءَ راست کرتگ ءُ آیانی آجوئی ءِ لوٹ کرتگ۔
پانک ءِ گوشگ اِنت کہ سگیر اھمد ء گلام کادر یکبرے پیسر ءَ 20 نومبر 2017 ءَ بیگواہ کنگ بیتگ داں سالے ءَ چیریں آزار جاھاں چہ بازیں آزار دیگ ءَ پد یل کنگ بیتگ۔
ھمے وڑ ءِ چار جون ءَ چہ جاھو ءِ ھند کورک ءَ پاکستانی پوج ءَ مکتیار ء اشرپ نامیں ورنایے آوار جتگ ءُ بیگواہ کرتگ کہ انگت ءَ بیگواہ اِنت۔
چار روچ پیش پاکستانی پوج ءَ ٹیکدار بشیر اھمد ء ھسن نامیں مردمے ھما وھد ءَ آوار جتگ کہ آ چہ لسبیلہ ءَ دیم پہ جاھو ءَ روگ ءَ بیتگ۔ بیگواھیں بشیر اھمد جاھو ءِ ھند گزی ھسن گوٹ ءِ جاہ منند اِنت۔
زرمبش اھوالکار ءِ رد ءَ دوشی ادار سے ءَ پاکستانی پوج ءُ چیریں ادارھاں ناگ ءَ گسے ءَ بیڑ برتگ ءُ زابد ء رزاک نامیں ورنایے آوار جتگ ءُ بیگواہ کرتگ۔
