بلوچ راجی زْرمبشت ( بی این ایم ) ءِ جارکش ءَ برتانیائی پارلیمان ءَ ’ بلوچ چکچینی ءِ بگیری ءَ برجاھیں روانک ءِ پلہ مرزی ‘ ءَ پیش کنگ بیتگیں جان میکڈونل ءِ زْرمبشت نیکیں مستاگے لیک اتگ ءُ چہ برتانیائی پارلیمان ءِ باسکاں ایشی ءِ سرجمیں پلہ مرزی ءِ دزبندی کرتگ۔
’ ما جان میکڈونل ، اے زْرمبشت ءِ پلہ مرزی کنوکیں گل لیبر پارٹی ،اسکاٹش نیشنل پارٹی ، ڈیمو کریٹک یونینسٹ پارٹی ءُ ھما درسیں برتانیائی پارلیمانی باسکانی منت ءَ گر ایں کہ آیاں مردمگری ءِ پلہ مرزی ءَ وتی توار چست کرتگ۔اے برتانیا ءِ مردمانی مڑاہ ءِ ھم گپ اِنت پرچا کہ چہ آیانی سنگانی زراں مردمگری ءِ بگیری ءَ میار کنوکیں پاکستانی مھتر ھند ءِ کمک کنگ بیت۔‘
درشان ءَ گْوشگ بیتگ بلوچستان ءِ جاور بلوچستان ءِ سر ءَ پاکستان ءِ زورگری ءِ پد ءَ ھراب بیتگ اَنت۔ بلوچستان ءَ چہ گْوستگیں 75 سال ءِ زیردستی ءِ بدتریں باریگ ءَ در کنگ ءَ میان استمانی دلگوش ءُ کمک پکار اِنت۔ نی ھما وھد اتکگ کہ بلوچ راجی زْرمبشت تچکے ءَ کمک کنگ بہ بیت۔ چہ امریکا ، برتانیا ، یورپی سنت ءُ راجانی سنت ءِ جھگیراں ھمے اوست دارگ بیت کہ آ بلوچ ءِ پلو ءَ اوشت اَنت۔
جارکش ءَ گْوشتگ زور بیگواھی ءُ درآمیدگسی کوش بلوچستان ءَ مردمی اگبالانی چہ درساں مستریں بگیری اَنت بلے چہ ایشی ءَ سرجمیں جاور پدر نہ بیت۔ بلوچستان ءِ سر ءَ بیوکیں زوراکیانی دراجیں لڑ ءُ گْوستانکے۔کسے ابید چہ ایشی ءِ ھیرتچاری ءُ وانگ ءَ بلوچستان ءِ جیڑہ گیش اِت نہ کنت۔ بلوچ وتی راجی وتواکی ءُ وتی گلزمین ءِ سر ءَ سرجمیں واکداری ءِ لوٹوک اِنت۔
آئی ءَ گْوشتگ بلوچستان ءِ زور گرگ ءَ پد بلوچ چہ درسیں بنکی اگبالاں زبھر کنگ بیتگ چہ ایشی ءَ بلوچ چاگرد پدمنتگ بیتگ۔مروچی ھم بلوچ کْوھنیں زمانگ ءِ وڑ ءَ زند گْوازینگ ءَ اَنت ءُ ھرچ تک ءَ پدمنتگ کنگ بیتگ اَنت۔بلوچ راج ءِ دیمروی ءِ دیم ءِ دارگ ءَ آئی ءِ گزرانک تباہ کنگ بیتگ۔ زمین چیری مڈی پلگ بیگ ءَ اَنت ، زر ءَ ناراھی گجو جنوکیں ٹرالر بے مھار یلہ دیگ ءُ زری ساھدارنی توم چینی کنگ بیگ ءَ اِنت ، گڈانی ءِ گراب پروشگی بندن ءِ پارست ءَ زَریں ساوڑ ءَ گند ءُ گسڑ مان ریچگ بیگ ءَ اِنت، تچوکیں کورانی سر ءَ ڈیم جوڑ کنگ ءُ ڈگار ھوشاپینگ بیتگ اَنت چہ ایشی ءَ زمین ءِ چیر ءِ آپانی تہ ءَ ھم کمی اتکگ۔ اگاں بلوچستان ءِ سر ءَ زورگری آیوکیں دگہ لھتے سالاں برجاہ بہ بیت گڑا بلوچستان ءَ مزنیں مردمی جیڑھے ودی بیت، ایشی ءِ دمگ ءِ سر ءَ داں دیر ءَ کشانکی ئیں سان بہ اَنت۔
بی این ایم ءِ جارکش ءَ گْوشتگ بلوچ ءَ پہ وتی گلزمین ءِ آجوئی ءَ پاکستانی زوراکی ءُ لشکرکشیاں پد ھم پرایمنیں جھد ءِ راہ یلہ نہ داتگ بلے پاکستانی لشکر ءَ مدام گوں ھنر ءُ ھنپاں پرایمنیں جھد لپاش اتگ اَنت ءُ بلوچ سیاسی کارکنانی سر ءَ بدتریں زوراکی کرتگ۔ بی این ایم وڑیں پرایمنیں گلانی سروکاں گر داں باسکاں سدانی کچ ءَ شھمیر کرتگ ، وھدے کہ بازیں باسک چہ سالاں زور بیگواہ اَنت۔ مارا چہ مردمی اگبالانی بدتریں جاوراں در کپگ ءَ میان استمانی کمک پکار اِنت۔چین ، سئودی ارب ، امارات ءُ جھان ءِ دگہ ڈیھاں باید اِنت کہ آ بلوچستان ءَ پاکستان ءِ پلو ءَ سرمایہ گزاری مہ کن اَنت ءُ آئی ءَ لشکری ءُ مالی کمک دیگ ءَ پھریز بہ کن اَنت۔
