بلوچ نیشنل موومنٹ ( بی این ایم ) ءَ بلوچ نودر بر گل ( بی ایس او ) آزاد ءِ بنجاھی سروک ذاکر مجید ءِ زور بیگواھی ءِ شانزدھمی سالروچ ءَ ماں لندن ءَ برتانیا ءِ سروزیر ءِ گس ءِ دیم ءَ زھرشانی کرتگ۔
زھرشانی کنوکاں جرنبشت ءُ شیراز تاک گون بیتگ کہ آیانی سر ءَ ’’ ذاکر مجید ءَ یلہ بہ کن اِت ‘‘ ، زور بیگواھیاں بند بہ کن اِت ‘‘ ءُ ’’ زور بیگواھیں مردماں انساپ بہ دے اِت ‘‘ رنگیں اوگام نبشتہ اَت۔بھر زیروکاں میان راج ءُ چہ برتانیا ءِ سرکار ءَ لوٹ کرتگ کہ آ ماں بلوچستان ءَ مردمی ھکانی بگیری ءِ سر ءَ دلگوش بہ دے اَنت ، مادنیں گامگیج بہ زیراَنت ءُ پاکستان ءَ زور بہ دے اَنت کہ آ زور بیگواھیں بلوچاں سھرا بہ کنت۔
اے درگت ءَ ذاکر مجید ءِ مات راج بی بی ءَ گوں زھرشانی کنوکاں تْران کنان ءَ درائینتگ کہ آئی ءَ پاکستان ءَ انساپ نہ رس اتگ پمیشکا ناچاری لڈ اتگ ءُ برتانیا ءَ اتکگ داں آ ذاکر مجید ءِ پجیگ ءَ چہ پاکستانی ریاستءِ دست ءَ زور بیگواہ کنگ بیتگ ھمک مردم ءِ توار جوڑ بیت بہ کنت کہ پاکستان ءَ پہ آیاں انساپ ءِ اوست ءُ واھگ اشکند کرتگ اَنت۔
چہ زھرشانی ءَ تْران کنان گْوشتانک دیوکاں گْوشتگ مروچی ما اد ءَ زھرشانی کنگ ءَ ایں داں جھان ءَ گْوشت بہ کن ایں کہ بلوچ راج چونیں زوراکیانی دیمپان اِنت ، پاکستانی ریاست بلوچاں پمیشکا زوراکی ءِ نشانگ کنگ ءَ اِنت کہ آ بلوچ اَنت ، اے گپ ءَ نہ چار ایت کہ آ چونیں لیکہ ءُ دیدانک ءِ منوگر اَنت۔
بی این ایم ءِ راھشوناں وتی تْرانانی تہ ءَ اے درشانتگ کہ زور بیگواھی رنگیں در مردمی زوراکیانی سر ءَ بلوچ راج یک توار اِنت ءُ گوں یک ڈکے ءَ یکیں دیدانک ءِ سر ءَ برجاہ اِنت ، داں کہ پاکستان جست ءُ پرس کنگ نہ بیتگ ءُ زور بیگواھیں مردم درا نہ بیتگ اَنت ، زور بیگواھیانی بگیری ءَ اے جھد برجاہ بیت۔
گوں زھرشانی کنوکاں ذاکر مجید ءِ مات ءَ ابید بی این ایم ءِ کستر کمک سرکارگشاد ھسن دوست ، دری کارانی کارگشاد پھیم ، دری کارانی بھرگ ءِ راھوتکار نیاز ءُ بی این ایم برتانیا ءِ کماش ماسٹر منزور ءَ گپ جتگ۔آیاں ناں ایوک ءَ بلوچستان ءَ برجاھیں ریاستی زوراکی ءِ سر ءَ گپ جتگ بلکیں چہ برتانیا ءُ میان راج ءَ لوٹ کرتگ کہ آ گوں اشتاپی ءَ بلوچستان ءِ جاورانی سر ءَ دلگوش گْور بہ کن اَنت ءُ تہ ءَ بہ کپ اَنت۔اے درگت ءَ زور بیگواھی ءُ بلوچستان ءِ جاورانی سر ءَ تاک ھم بھر کنگ بیتگ۔
