شال: پہ زور بیگواھیں مردمانی پدجنگ ءَ شدکشیں زھرشانی گدان ءَ شانزدہ سال ءُ سیزدہ روچ سرجم بیتگ۔ سے شمبے ءِ روچ ءَ وی بی ایم پی ءِ کمک سرکماش ماما کدیر جاندراھی ءَ پد گدان ءَ اتکگ ءُ گوں جتائیں مردماں زوریں بیگواھی ءُ بلوچستان ءِ انسانی ھکانی جاورانی سر ءَ گپ جتگ ءُ وتی زھرشانی یاداشت کرتگ۔ اے وھد ءَ وی بی ایم پی ءِ سرکماش نسر اللہ ھم گدان ءَ ساڑی بیتگ۔
وی بی ایم پی ءَ بلوچستان ءِ جاورانی سر ءَ بژن درشان کرتگ ءُ گوشتگ کہ بلوچستان ءَ زوریں بیگواھی ءِ جیڑہ گیش تیز کنگ بیتگ۔ چہ دھکاں مردم زور بیگواہ کنگ بوگ ءَ اَنت، جنینانی زوریں بیگواھی ءِ گیش بوگ مردمانی چہ انساپ ءُ کانود ءَ بیسہ ءَ ھلاس کنت۔ ریاست مچی سزا ءِ شوندات ءَ پہ انسانی ھک، سیاسی ءُ شھریانی آجوئی ءَ چست بیوکیں توار ءِ دارگ ءَ کارمرز کنگ ءَ اِنت۔
وی بی ایم پی ءَ زور بیگواھیں مردمانی زوتیں آجوئی ءُ بلوچستان ءَ سیاسی ءُ چاگردی ھکانی دیگ ءِ لوٹ کرتگ۔ ریاست ءَ سلاہ بندیں گل ءُ پر ایمنیں شھریانی میان ءَ پرک زانگ لوٹ ایت۔
