بلوچستان لبریشن پرنٹ (بی ایل ایپ) ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچاراں دوشی ادار ھشت ءَ پَنجگُور ءِ ھند تسپ ءَ برجاھیں پنجی پولیس تانہ ءَ اُرش کرتگ۔ اود ءَ ایریں سرکاری سلاہ ءُ سامان دستیگ کرتگ اَنت ءُ دو گاڑی مانداشتگ۔ کاروائی ءِ سرجم بوگ ءَ پد سرمچار پہ سلامتی چہ اود ءَ درکپتگ ءُ وتی بنَدْراں شُتگ اَنت۔
آئی گوشتگ کہ پنجگُور تسپ ءَ برجاھیں پنجی پولیس تانہ سرجم ءَ ایم آئی ءِ دست ءَ اِنت ءُ آیانی گوشگ ءِ پد ءَ زر گر اَنت، مھلوک ءَ بے میار ءَ ترسین اَنت، ٹوکن سسٹم ءِ سر ءَ وتی دلیگاں کن اَنت ءُ دگہ چاگردی سلکاریاں ھم ھوار اَنت۔
آئی گوشتگ کہ ما ھر وھد ءَ وتی درشاناں پولیس کڈن کرتگ کہ آ چاگردی سلکاریاں ھوار مہ بنت ءُ سرمچارانی رندگیری ءَ پھریز بہ کن اَنت بلے آ چہ وتی اے کار ءَ دزکش بوگ ءَ نہ اَنت۔ ما بلوچستان ءِ درسیں پولیس ھاس کر پنجگور پنجی پولیس تانہ ءِ کارمنداں کڈن کن ایں کہ آ دگہ بر ءَ سرکاری چریکاں گوں ھوار بوگ ءُ بلوچ راج ءِ ترسینگ، چاگردی سلکاریانی سروکی ءَ یل بہ دینت ءُ زرمبشت ءِ بگیریں کاراں چہ وت ءَ دور بہ دار اَنت اگاں نہ گوں آیاں دژمن ءِ وڑ ءَ پیش بہ ایں
میجر گھرام ءَ پَنجگُور تسپ ءَ برجاھیں پنجی پولیس تانہ ءِ دستیگ کنگ ءُ ماندارگ ءِ زمہ واری من اِتگ ءُ گوشتگ کہ ھمے کول ءَ کن ایں کہ بلوچ راجی زرمبشت ءِ بگیریں کاراں ھواریں مردم ءُ ٹولیاں نہ بکش ایں۔
