بلوچ نیشنل موومنٹ ( بی این ایم ) زرباری کوریا ءِ سرکماش نسیر اھمد ءَ وتی جنک ھپسہ بلوچ ءِ سور ءِ درگت ءَ کتابے نبشتگ ءُ سوگات کرتگ۔ آئی ءَ گوشتگ کہ جھان ءَ پت وتی جنکاں گرانھادیں ھیرہ، سھتءُ زیور، یا ماڑی ءُ دگہ گرانھادیں چیز سوگات کن اَنت دانکہ آ جھان ءِ نگاھان، امیر، شرپدارءُ نامدار بہ بیت، بلے من مدام جیڑ اتگ شریں مڈی آ نہ اِنت کہ بینک ءَ بہ بیت یا زیور پیتی ءَ بند بہ بنت۔ مڈی ھما اِنت کہ یک پدریچے ءِ مارشت ءَ مٹ بہ کنت، ھما یک جنکے ءِ دست ءَ تھنا براھدار مہ بیت بلکیں سرجمیں راج ءِ آجوئی ءِ چراگ ءَ دست ءَ بدے۔
اے کتاب ءِ بابت ءَ بلوچ نیشنل موومنٹ ءِ رسانکدری کارگشادکازی داد مھمد ریھان ءِ گوشگ اِنت کہ اے کتاب ’ جبری غلامی سے لے کر فکری آزادی تک ‘ءَ تھنا گوں یک مردمے ءَ دلگوش دیگ نہ بیتگ بلکیں بلوچستان ءِ آجوئی زرمبشت ءِ بنکی پگرءُ لیکہ ءَ گوں ارزانیں زبانے ءَ پیش کنت۔ اے کتاب ءِ درسیں نبشتانک ھمے چیز ءِ سر ءَ اَنت کہ پہ پارٹی ءِ نوکیں باسکاں ھیلکاری مواد ءِ بستار ءَدار ایت۔ من ھمے گوش آں کہ اے پارٹی ءِ دیوانانی تہ ءُ وانگ بہ بیت۔
نسیر اھمد وتی کتاب ءِ بابت ءَ نبشتہ کنت کہ کتابک منی دادے تھنا پہ وتی جنک ءَنہ اِنت بلکیں پہ ھمک ھما بلوچ جنک ءَ اِنت کہ زندان ءَھم اوست ءِ چراگ اَنتءُ دیمونی دیگءَ اَنت ءُ پشت ءَ نہ کنز اَنت۔
نسیر اھمد بلوچ زرباری کوریا ھنکین ءِ سرکماش اِنت ءُ آئی جنک ھپسہ بلوچ بی این ایم ءِ پرکاریں کارکنے ۔ آئی ءَ بازیں وھدے بیت کہ گوں ریڈیو زرمبش ءَ کار ءَ اِنت، بلکیں آ پارٹی ءِ زھرشانی ءُ پروگراماں ھم شریں وڑے ءَ بھر زور ایت۔
اے کتاب ءِ پی ڈی ایپ زرمبش شنگکاری ءِ ٹیلیگرام چینل ءَ شنگ بیتگ کہ آئی ءَ چہ جھل ءَ داتگیں لنک ءَ ڈونلوڈ کرت کن اِت۔
