لندن ءَ بلوچ نودربر سروک زاکر مجید ءِ زوریں بیگواھی ءِ سالروچ ءَ بلوچ نیشنل موومنٹ ءِ نیمگ ءَ پہ زاکر مجید ءُ آدگہ زور بیگواھیں مردمانی آجوئی ءَ زھرشانی کنگ بیتگ۔
زھرشانی لندن ءِ شھر 10 ڈاؤننگ اسٹریٹ ءَ بیتگ، زھرشانی ءَ زوربیگواھیں زاکر مجید ءِ مات، بی این ایم ءِ بنجاھی کستریں کمک کارگشاد ھسن دوست ءَ ھوار بی این ایم ءِ چپٹرانی باسک ءُ اود ءِ جاہ منندیں بلوچاں بازیں کچے ءَ بھر زرتگ۔
زھرشانی کنوکیں مردماں زاکر مجید، بی وائی سی ءِ بندیگیں سروک ءُ آدگہ زور بیگواھیں مردمانی اکس، پلے کارڈ ءُ بینر دستاں بیتگ اَنت کہ آیاں زور بیگواھیں مردمانی آجوئی ءُ زوریں بیگواھی ءِ بند کنگ ءُ ریاستی زوراکیانی بگیری ءَ اوگام جتگ۔
زھرشانی ءَ بی این ایم ءِ سروک، باسک ءُ آدگہ مردماں تران کرتگ ءُ بلوچستان ءَ پاکستانی پوج ءِ زوراکیانی بابت ءَ وتی ھیال درشان کرتگ اَنت۔
چوش کہ چہ ایشی ءَ پیش ھم بلوچ نیشنل موومنٹ ءِ نیمگ ءَ ڈائسپورہ ءِ جتائیں شھراں پاکستانی لشکر ءِ زوراکی ءُ پاکستان ءِ بلوچستان ءِ سر ءَ زوریں کبزہ ءِ بگیری ءَ زھرشانی کنگ بیتگ۔
