بلوچ سروک مھران مری ءَ وتی گلگدارے ءَ بلوچ آجوئی زرمبشت ءِ جنجالانی بابت ءَ بے تواری ءُ ھمساھگیں ڈیھ ھندوستان ءُ اوگانستان ءِ کرد ءِ سر ءَ تران کرتگ۔
آئی ءَ گوشتگ کہ اوگانستان ءَ چہ بنداتی روچاں گوں بلوچاں ھمدردی کرتگ ءُ باز کمک کرتگ بلے اوگانستان انوں وت پاکستان ءِ زوراکیانی آماچ اِنت۔
مھران مری ءَ بھتام جتگ ءُ گوشتگ کہ پاکستان ریاست ءُ پوج ءَ اوگانستان ءِ وتی پنچمی استان جوڑ کنگ ءِ جھد کرتگ ءُ اوگانستان داں ھما ھد ءَ نزور کرتگ کہ آ وتی پاداں اوشتات نہ کنت۔ اگاں اوگانستان مھکم بوت ایں گڑا بلوچاں چہ دگہ کس ءَ کمک درکار نہ اَت۔
آئی ءَ ھندوستان ءِ سر ءَ شرگداری کرتگ ءُ گوشتگ کہ ھندوستان کمک کنگ ءَ ابید آ داں ھشکیں گپ ءُ ٹی وی ءِ تراناں بندوک اِنت۔ زمینی راستی ھمیش اِنت کہ نہ کسے کمک کنگ ءَ اِنت ءُ نہ آیانی لیکہ تچک اِنت۔
مھران مری ءَ گوشتگ کہ اے وھد ءَ بلوچ راج ءِ چکچینی کنگ بوگ ءَ اِنت ءُ میان استمان ءِ بے تواری ءِ سر ءَ بژن اِنت۔ اگاں ھندوستان راستے بلوچانی پلہ مرزی ءَ کنت گڑا آ اکوام متھدہ ءُ آدگہ میان استمانی ادارھاں بلوچ ءِ جیڑہ ءَ دیم ءَ بیار ایت ءُ زوراکی جھان ءِ دیم ءَ آشکار کنگ لوٹ اَنت۔
آئی ءَ گوشتگ کہ ما پہ وشی اے گپ ءَ نہ جن ایں کہ جھان مئے کمک ءَ اِنت بلے راستی ءَ مئے گون ءَ ھچ وڑیں کردی پلہ مرزی نیست، وھد ھمیش اِنت کہ جھان بلوچانی کیس ءَ گوں سنگینی ءَ بہ زور ایت ءُ آیانی جھد ءَ بہ من ایت۔
