اورماڑہ: 13 جنوری 2024 ءَ اورماڑہ کتابجاہ ءِ نیمگ ءَ کیریر کاؤنسلنگ ءِ سر ءَ یک مراگشے برجم دارگ بوتگ۔ مراگش جِتا جتائیں بھرانی تہ ءَ بوتگ، آئی ءِ تہ ءَ گشتانک،پینل ڈسکشن، جُست ءُ پسّہ، کسمانک، مراگش ءَ ھوار بوتگ اَنت۔
مراگش ءِ اولی بھر( گشتانک) ءِ تہ ءَ نودربر، استاد ءُ آ دگہ اِلم دوستیں مردماں وتی ھیال درشان کرتگ اَنت ءُ نودربران ءَ وانگ ءِ اڑ ءُ جنجالانی بابت ءَ سر ءُ سوج کرتگ۔ دیوان ءِ دومی بَھر پینل ڈسکیشن بوتگ کہ آئی ءِ تہ ءَ موڈیریٹر ءَ اورماڑہ ءِ وانگ ءِ بابت ءَ پینلسٹانی دیم ءَ وتی جست ایر کُت اَنت ءُ دیوان ءَ اورماڑہ ءِ وانگ ءُ زانگ ءِ سر ءَ تران کنگ بوتگ۔
پینلسٹانی تہ ءَ وانگجاہ ءُ وانشجاہ ءِ راھدربر، نودربر ءُ گوں الم ءَ بندوکیں مردماں وتی گوْش داروکاناں اورماڑہ ءِ وانگ ءِ پدمنتگی ءِ سوب، ءُ آئی ءِ گھتری ءِ ھوالہ ءَ وتی شور ءُ سلاہ داتگ اَنت۔
ھمے وڑ ءَ دیوان ءِ سیمی بھر ءِ تہ ءَ استاد ءُ نودربراں وتی کسمانک ءِ وسیلہ ءَ وانگ ءِ ارزشت ءِ سر ءَ وتی ازم پیش داشتگ اَنت، گوں وتی وشیں گپءُ تراناں گوشداروکانی دل وش کرتگ اَنت۔
دیوان ءِ چارمی بھر جست ءُ پسّو بوتگ کہ آئی ءِ تہ ءَ کتابجاہ ءِ کارمستر ءَ نودربران ءَ جتائیں سرھالانی سر ءَ جست کرتگ ءُ پسّو دیوکیں نودربرانی دلبڈی ءِ ھاتر ءَ کسانوکیں دادے ندر کرتگ۔
دیوان ءِ ھلاس کنگ ءَ پیسر کتابجاہ ءِ کارمستر ءَ اورماڑہ کتابجاہ ءَ را واجہ گوس بھار کتابجاہ اورماڑہ ءِ نام دیگ ءِ جار جتگ ءُ گڈسر ءَ مراگش ءِ بھر زوروکیں مردم ءُ مھمانان ءَ کتاب سوگات کنگ بوتگ ءُ کارگشاد ءَ مراگش ءَ بھر زوروکیں مردمانی منت گپت ءُ دیوان ءِ ھلاسی ءِ جار جَتگ۔
