گوادر: جیمڑی ءِ میتگ کلدان ءَ پاکستانی لشکر ءِ ھندی چریکے ءَ زھرشانی ءَ در کپتگیں زھگ ءُ جنین لٹ شاپ کرتگ انت۔
اھوالکار ءِ رد ءَ مرچی سھب ءَ جیمڑی ءِ میتگ کلدان ءَ بازیں کچے ءَ زھگ ءُ جنین اسلام آباد ءَ برجاھیں زھرشانی نندانک ءِ پلہ مرزی ءَ زھرشانی ءَ در کپتگ اَنت کہ پاکستانی لشکر ءُ چیریں ادارھانی جوڑ کرتگیں ھندی چریک اکبر کلمتی ءَ زھگ ءُ جنین لٹ شاپ کرتگ انت ءُ روانک ءِ کشگ ءَ نہ اشتگ انت۔
یات بہ بہ ات کہ چہ ایشی ءَ پیش 9 جنوری ءَ ھم کلدان ءِ مھلوک ءَ گوں زھگ ءُ جنیناں ھوار مزنیں کچے ءَ زھرشانی روانک ءِ پلہ مرزی ءَ زھرشانی کرتگ اَت ءُ چہ آ زھرشانی ءَ پد ھم گوادر ءِ ایم آئی ءَ روانک ءِ سروک گوادر ءَ لوٹاھینتگ ءُ بیهار داتگ اَنت. آئی ءَ پد ایم آئی ءَ 11 جنوری ءَ ھمے مردماں لھتے پاکستانی بیرک داتگ ءُ میتگ وانگجاہ ءَ دیم داتگ انت ءُ ایشاں پاکستانی بیرک پہ زور نودربرانی دست ءَ داتگ انت ءُ اکس کشّ اتگ۔
اکبر کلمتی ءِ نیمگ ءَ زھگ ءُ جنینانی لٹ شاپ کنگ ءَ ھندی مردم گوں ترندیں دانکاں ایر جنگ اَنت، مردمانی گوشگ اِنت کہ مئے زھگ ءُ جنیناں دگہ میارے نہ کرتگ ءُ اکبر ءِ اے کار باید ایرجنگ بہ بیت ءُ آ گِر ءُ دار کنگ بہ بیت.
مردمانی گوشگ اِنت کہ اگاں پہ راست ءِ پلہ مرزی ءَ لشکر مارا ماں سیمسر ءَ کار ءَ نہ ھلّ ایت ھم پروا نیست، لشکر ءُ آئی ءِ چریک مارا گوں اے بیھار ءَ چہ راستی ءِ ھمراھی ءَ داشت نہ کن اَنت.
یات بہ بہ ات کہ گوادر ءِ کرّ ءُ کشاں پاکستانی لشکر ءُ چیریں ادارھاں سیمسر ءَ تیل ءِ باپار ءِ سروکی کنگ ءِ نام ءَ پہ وت ءَ بازیں چریک داشتگ کہ آ مدام ھندی مردماں چہ روانکانی بھر زیرگ ءُ بلوچ زرمبشت ءِ پلہ مرزی ءَ مکن کن اَنت
