بلوچ نیشنل موومنٹ ( بی این ایم ) ءِ سرکماش ڈاکٹر نسیم بلوچ ءَ وتی شنگ کرتگیں درشانے ءَ گوشتگ کہ مروچی استاد سبا دشتیاری ءِ شھیدی ءِ سالروچ اِنت۔ اے روچ تھنا آئی ءَ یات کنگ ءُ پہ آئی ءَ ستا درشانگ ءِ روچ نہ اِنت بلکیں لیکہ، جھد ءُ پگرے ءَ را منگ اِنت۔
آئی ءَ گوشتگ کہ پروپیسر سبا دشتیاری زانشتجاہ ( یونیورسٹی ) ءِ تہ ءَ ایوک ءَ استادے نہ بوتگ، آ یک سرجمیں کتابجاھے بوتگ۔ سوپی لیکہ ءِ رد ءَ آشوبی یے بوتگ ءُ شائرے ھم کہ آئی ءِ گپاں بے تواری پروش داتگ اَت۔ آئی ءَ ایوک ءَ کتابانی پارست ءَ وانگ ءُ زانگ ءِ درس نہ داتگ، بلکیں چہ چیردستی ءِ تھاری ءَ در آیگ ءُ آزاتیں سسایے ( فکرے ) دیم ءَ آرتگ۔
ڈاکٹر نسیم بلوچ ءَ گوشتگ کہ آ وتی ریاستی پگار ءُ داد ءُ دئش چہ وتی لیکھی مڈی ءُ راجی ستک ءُ باوراں دیم ءَ بوت گوں راج ءَ راھادگ بوگ ءِ شور ئےِ کت۔ آئی ءَ وتی زند پہ بلوچ، بلوچستان، بلوچی، سیاسی مچی ءُ پہ گھگیری ءِ زْرمبشت ( مزاحتمی تحریک ) ءَ نْدر کرتگ اَت۔ آئی ءِ کلم آئی ءِ سلاہ جوڑ بوت ءُ آئی ءِ زانت گھگیری ءِ چیدگ بوت۔
آئی ءَ گوشتگ کہ 2011 ءَ شال ءِ دگانی سر ءَ تیر گواری ءَ آ شھید بوت۔ دژمن ءَ گْوشت کہ من سبا ءَ کُش آن ءُ آئی پگر ءِ تالانی ءَ آسر کن آں، بلے مروچی ھم بلوچ ءِ اوبادگانی تہ ءَ آئی ءِ لیکہ، سما ءُ سسا زندگ اَنت۔ آ مروچی ھم پہ زبان، پجار ءُ آجوئی ءَ گھگیری کنگ ءَ اِنت۔
بی این ایم ءِ سرکماش ءَ گوشتگ کہ سبا دشتیاری ءِ یات کنگ ایوک ءَ گْوست ءِ یات کنگ نہ اِنت بلکیں گوں آئی ءِ دیدانک ءَ وتی ھمگرنچی ءِ درانگاز اِنت ھم۔ آ ھمک بلوچ ءِ دل ءِ تہ ءَ اِنت کہ ترس ءِ بگیری ءَ راستی ءِ گپ ءَ جنت، وتی سرڈگار، وتی زبان ءُ پہ وتی ھک (اگبال ) ءَ اوشتاتگ۔
