شال: پہ زور بیگواھیں مردمانی پدجنگ ءَ وی وی ایم پی ءِ زھرشانی گدان ءَ 5844 روچ سرجم بیتگ۔ آدینگ ءِ روچ ءَ زور بیگواھیں ابدلگنی بلوچ ءُ ایمل بلوچ ءِ کھول ءَ زھرشانی گدان ءَ بھر زرتگ ۔
وی بی ایم پی ءِ سرکماش نسراللہ بلوچ ءَ ابدلگنی بلوچ ءُ ایمبل بلوچ ءِ زوریں بیگواھی ءِ سر ءَ بژن درشان کرتگ ءُ چہ سرکار ءَ لوٹ کرتگ کہ اگاں ابدلگنی بلوچ ءُ ایمل ءِ سر ءَ چونیں ھم بھتامے ھست گڑا آمیدگس ءَ پیش کنگ بہ بنت ءُ وتی بے میاری ءِ پیش کنگ ءِ موہ دیگ بہ بیت۔ اگاں بے میار اَنت گڑا زوت یل کنگ بہ بنت۔
آئی ءِ گوشگ اِنت کہ بیست ءُ دو ءُ بیست سے مئی ءِ میانی شپ ءَ سی ٹی ڈی ءُ آدگہ لشکری ادارھاں چہ شال ءِ ریڈ زون ءَ بیگواھیں کسان سالیں ایمل بلوچ ءِ کیس گل ءَ پہ زور بیگواھیں مردماں جوڑ بیتگیں کمیشن ءُ بلوچستان سرکار ءَ داتگ۔
زور بیگواھیں ابدالگنی بلوچ ءِ کھول ءِگوشگ اِنت کہ آ 25 مئی ءَ چہ شال ءَ کراچی ءَ روگ ءَ بوتگ کہ چہ ھزدار ءَ پاکستانی پوج ءَ مساپرانی دیم ءَ آوار جتگ ءُ بیگواہ کرتگ، آئی بابت ءَ کھول ءَ ھچ گوشگ ءَ نہ اَنت۔
