بلوچ نیشنل موومنٹ ( بی این ایم ) جھان ءَ اے باور کنائینگ لوٹ ایت کہ چیردستیں بلوچستان ءِ مردم گْورے تچکے ءَ پاکستانی لشکر ءِ ارشانی دیمپان اَنت ءُ نیمگے در دودی شوندات ۔ چوش کہ دینی ناشرکاری ءُ ’’ گندگیں ایٹمی مراگش ‘‘ ءِ ھم آماچ اَنت۔
اے گپ چہ بلوچ نیشنل موومنٹ ( بی این ایم ) ءِ نیمگ ءَ درشانگ بیتگ اَنت۔ بی این ایم ءَ امریکا ءِ بنجاھی شھر واشنگٹن ڈی سی ءَ اسپیتگیں ماڑی ( وائٹ ھاؤس ) ءُ امریکا ءِ دری کارانی کارگس ءِ دیم ءَ ءُ واشنگٹن پرگنگ ( پَر گِنگ : اسٹیٹ ، ڈیھے ءِ مزنیں انتظامی یونٹ ) ءَ ھمے یکیں وھد ءَ 28 مئی ءِ بارہ ءَ کارزارے برجم داشتگ۔بی این ایم امریکی تک ءِ کماش سمی ءِ سروکی ءَ اے کارزار ءِ میان ءَ 28 مئی ءِ درگت ءَ پنتاک بھر کنگ بیتگ۔اے کار ءَ مھمد ھسن ءُ بی این ایم واشنگٹن پرگنگ ءِ باسکاں بھر زرتگ۔
ھمے رد ءَ امریکا ءَ ابید آلمان ( جرمنی ) ءُ نیدرلیںڈز ءَ ھم زھرشانی ءُ روانک کشگ بیتگ۔ بلوچستان ءِ بازیں دمگ ، گوادر ، تربت ءِ کش ءُ گْور ءِ کوچگ ءُ ھلک پشوکان ، کلدان ، کلاتک ، شئے کھن ، نودز ءُ ناسرآباد ءَ ھم پنتاک بھر کنگ بیتگ۔بی این ایم ءِ پنتاک مزنیں کچے ءَ تندجاھی رسانک ءِ پارست ءَ بھر کنگ بہ اَنت بلے گل وھد پہ وھد بلوچستان ءِ مردمانی میان ءَ وتی ھستی ءِ درانگاز ءَ شھرانی تہ ءَ ھم کسانیں کچے ءَ کْوھنیں ربیدگانی رد ءَ دیوال نبیسی ءُ پنتاک بھر کنت ،اے کار چہ دیرو ( ڈیرہ غازی خان ) ءَ بہ گر داں جیمڑی ءَ سرجمیں بلوچستان ءَ بیت۔
ھمے دم ءُ درگت ءَ امریکا ءَ بیتگیں کارزار ءِ میان ءَ اے نیمگ ءَ ھم دلگوش گْور کنگ بیتگ کہ سلیمان کوہ ءِ جاھمنند ھم چہ ایٹمی تابکاری ءَ تھر پہ تھریں شیمک ءُ ڈی این اے ءَ تاوان دیوکیں نادْراھیانی آماچ اَنت ۔ چہ آ اود ءَ یورینیم ءِ کھن کاری بیت ءُ ڈیرہ گازی ھان ءِ آبادیں ھند بغلچور ءَ پاکستان اٹامک انرجی کمیشن ’ ایٹمی آکوٹ ‘ کل کنگ ءَ اِنت۔ناپتیں ( غیرجانبدار ) پارستاں ھم اے جیڑہ ءِ چار گزار ءَ آزاتیں رنگے ءَ پٹ ءُ پول کنوکیں پترے ءِ لوٹ کرتگ کہ دنیگت منگ نہ بیتگ۔
امریکا ءَ بی این ایم ءِ باسکاں ماں واشنگٹن ءَ مردم گپ جتگ ءُ اے بارہ ءَ سھی کرتگ اَنت کہ 1998 ءَ پیش پاکستان ءَ مدام گْوشتگ اَت کہ آئی ءِ ایٹمی مراگش پہ پرایمنیں کاران اِنت بلے انچوش کہ موہ ئِے رس اِت ، پاکستان ءِ چیریں لشکری سرکار ءَ وتی ’ گندگیں من ‘ پدر کرت ءُ 28 مئی 1998 ءَ بلوچستان ءِ ھنکین چاگے ءَ ءُ 30 مئی 1998 ءَ ھاران ءِ ریک ءَ شش ایٹمی چکاس کرت۔ اے بارہ ءَ آ اود ءِ مردم سھی کنگ نہ بیتگ اَنت ءُ ناں کہ آیانی چہ آ اود ءَ در کنگ ءِ چن ءُ لانچ کنگ بیتگ۔گْوشگ بیت کہ چکاسی تْراک زمین ءِ چیر ءِ ھونڈاں بیتگ اَنت پمیشکا تابکاری تالان نہ بیتگ ، گْوں زانشتی داستان نبیسی ءَ راستی ءِ بْراھداری رنگے ءَ چیر دیگ ءِ کوشست کنگ بیت۔
پاکستان ءِ دروگ ءَ پاشک کنان آیاں گْوشتگ دستاویزی مناک ءُ تامر ھست اَنت کہ چہ ایٹمی تْراکاں پد راسکوہ ءِ سرٹل آس گپتگ ءُ چہ تابکاری ءِ سان ءَ آئی ءِ ناسی ئیں رنگ پرو تر اتگ۔چہ اے چکاساں پد چاگے ءُ ھاران ءِ اگواز تچکے ءَ ایٹمی تابکاری ءِ دیمپان بوت ، چہ ایشی ءَ دمگ ءِ مردین ، جنین ءُ چک ھون ءِ شیمک ( لیوکیمیا ) ، تھر پہ تھریں شیمک ءُ تیلیسیمیا رنگیں نادْراھیانی آماچ بیگ ءُ مرگ ءَ اَنت۔چہ تابکاری ءَ سانمند بیتگیں دمگ ءَ سیرکرتگیں مرد ءُ جنیانی چک مات بیگ ءِ کچ ھم کم بیتگ۔
