پنجگور: پاکستانی پوج ءِ دست ءَ زوربیگواه کنگ بیتگیں جنگیان بلوچ ءِکھول ءَ آئی ءِ زوریں بیگواھی ءِ بگیری ءَ پروم ءَ ایپ سی ءِ بنجل ءِ دیم ءَ زهرشانی کرتگ۔
کھول ءِ گوشگ اِنت که پاکستانی پوج ءَ 26 مئی ءَ پنجگور ءِ ھند پروم ءَ کاروائی کرتگ ءُ جنگیان بلوچ ءِ ھواری ءَ پنچ مردم آوار جتگ ، چار مردم یل کنگ بیتگ بلے جنگیان انگت بیگواه اِنت۔
کھول ءَ گوشتگ که پاکستانی پوج ءَ جنگیان بلوچ آوار جنگ ءِ وھد ءَ باز آزار داتگءُ پد ءَ آوار جتگ ، جنگیان بلوچ بے میار اِنت ءُ آئی ءِ بگیری ءَ ھچ وڑیں بھتام ءُ منانک نیست۔
زھرشانی کنوکاں جنگیان ءِ یل کنگ ءِ لوٹ کرتگ ءُ گوشتگ که اگاں جنگیان زوت یل کنگ نه بوت نه ایوک ءَ ایپ سی ءِ بنجل ءِ دیم ءَ بلکیں شھدگ ءِ سر ءَ زھرشانی کن اِیں نندانک دے اِیں ، زھرشانی داں ھما وھد ءَ برجاہ بیت دانکہ جنگیاں آجو نہ بیت۔
