بلوچ نیشنل موومنٹ ( بی این ایم ) ءِ سرکماش ڈاکٹر نسیم بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ ماہ جبین ءِ آوار جنی بلوچستان ءَ دگہ یک میارباری یے۔ بیسمیگ ءِ جاہ منندیں جنک ماہ جبین ءَ پاکستانی پوج ءَ چہ شال ءَ آوار جتگ کہ اے یک زوراکی ءُ بژنی کارے، بلے اے نوکیں ویلے نہ اِنت۔
آئی ءَ گوشتگ کہ بلوچستان ءَ ھمک روچ اے وڑیں آوارجنی ءِ ویل بوگ ءَ اَنت۔ پاکستانی پوج ءُ نیم پوجی ٹولی تچک ءَ مردماں آوار جنگ ءُ بیگواہ کنگ ءَ اَنت ءُ چہ ایشاں گیشتر یل کنگ نہ بنت۔
ڈاکٹر نسیم بلوچ ءَ گوشتگ کہ زوریں بیگواھی میان استمانی کانودی ءِ رد ءَ مزنیں میارباری یے، بلے پاکستان مدام ایشی کنگ ءَ اِنت۔
بی این ایم ءِ سرکماش ءَ گوشتگ کہ جھان ءِ بے تواری پاکستان ءَ ھمے میارباری ءِ برجاہ دارگ ءِ آجوئی ءَ دنت۔ میان استمانی تک ءَ گیر آرگ لوٹ ایت کہ 1971 ءَ چے بوتگ، پاکستان ءَ بنگالیانی بگیری ءَ چکچینی کرتگ۔ مرچی بلوچستان ءَ ھما وڑ ءَ چکچینی کنگ بوگ ءَ اِنت۔ نوں جھان ءَ گپ جنگ لوٹ ایت۔
