شال: پاکستانی لشکر ءِ دست ءَ زور بیگواہ کنگ بیتگیں ماہ جبین بلوچ ءِ کھول ءَ شال پریس کلب ءَ پریس کانپریس کرتگ ءُ گوشتگ کہ پاکستانی لشکر یکشل ءَ مئے گساں بیڑ برگ ءَ اَنت۔ مئے آزیز چہ گس ءَ آوار جنگ ءُ آئی لاش جنگل ءَ چگل دیگ بیتگ۔ چنچو مردم داں مرچی ءَ چیریں آزار جاھاں بندیگ اِنت۔ ما ھم پرایمنیں زندے گوازینگ لوٹ ایں بلے ریاست مارا یکشل ءَ ترس آماچ کنگ ءَ اِنت۔
چار روچ پیش 26 مئی 2025 ءَ شپ ءِ یک ءُ نیم ءَ پاکستانی پوج ءُ ایم آئی ءِ کارمنداں بیڑ برتگ ءُ یونس بلوچ ءَ آوار جتگ۔ یونس بلوچ ھزدار زانشتجاہ ءِ انجیئنر نودربرے، آ یک جپاکشیں ورنایے چہ زانشت ءِ بنیاد ءَ وتی زندمان ءَ وشھال کنگ لوٹگ ءَ بیتگ۔ بلے بے تواری مئے نزوری لیکگ بیتگ ءُ دوشی یک ءُ نیم ءَ سی ٹی ڈی ءُ سادگ پوشاکیں کارمنداں یونس بلوچ ءِ گھار ماہ جنین ءَ ھم آوار جتگ ءُ بیگواہ کرتگ۔ ماہ جبین بلوچ بلوچستان زانشتجاہ ءِ سائنس ءِ نودربرے۔
آئی ءَ گوشتگ کہ زانشتجاہ ءِ وابجاہ ءَ جاہ نہ بیتگ پمشکا آ درسرکاری نادراھجاہ ءِ وابجاہ ءَ جاہ منند بیتگ۔ ماہ جبین چہ کسانی ءَ پولیو نادراھی ءِ آماچ بیتگ آ پادے ءَ لنگ اِنت۔ یک نادراھیں نودربرے شپ ءِ تھاری ءَ آوار جنگ ءُ بیگواہ کنگ بیت گڑا چاگرد ءِ سرءَ ایشی سان چے بنت۔ کسے ءِ جنک ءِ بیگواھی تھنا یک ویلے نہ بیت بلکیں آئی زندمان ءِ بربادی بندات بیت۔ ازت ءُ زندگی ءِ ھک چہ زوراکی ءَ پلگ بنت۔
آئی ءَ گڈسر ءَ گوں سول سوسائٹی، انسانی ھکانی ادارہ ءُ گوں جتائیں بھرگاں سیادی داروکیں مردماں لوٹ کرتگ کہ مئے گون ءَ توار چست بہ کن اِت۔
