بلوچ لبریشن آرمی ءِ جارکش جیھند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل اے وتی یک مزنیں ، وپادار ءُ دلیریں کماندار ملک ھان مھمد مری ء میرو ھان مری ءِ بیرانی ءَ وتی دلپدردی ءَ درشان کنت ءُ آئی ءِ بیرانی ءِ راستیں ھال ءَ راج ءِ باسمائیں بھرگاں سر کنت. آ یک دراجکشیں وھدے ءَ گوں بی ایل اے ءَ بندوک بیتگ ءُ داں زند ءِ گڈی روچاں گوں راجی کاراں بندوک بیتگ که آ دیمونی ، زانشت ءُ لیکھی سیادی ءِ بنیاد ءَ اَنت۔
آئی ءَ گوشتگ که کماندار ملک ھان مھمد مری چه انچیں کھولے ءَ بیتگ که آئی ءِ گھگیری گوستانک ، بلوچستان ءِ راجدپتر ءِ ته ءَ یاد کنگ بیتگ ، آئی ءِ پیروک جانی ھان مری ءَ زورگریں انگریز ءِ بگیری ءَ ھڑب ءِ جنگ ءَ گھگیری کرتگ ءُ شھید بیتگ ، اِے آئی ءِ کھول ءِ آشوبی دپتر ءِ بندات بیتگ ، آئی ءِ مستریں برات گلام نبی مری بازیں سلاه بندیں جنگاں گوں نواب ھیربکش مری ءَ همکوپگ بیتگ ءُ داں وتی بیرانی ءِ وھد ءَ هم نواب ھیربکش مری ءِ نزیکیں سنگتے بیتگ، چه ایشی ءَ پد ٹک ءِ پاگ ملک ھان مھمد مری ءِ سر ءَ دیگ بیتگ۔
جارکش ءَ گوشتگ که ملک هان مھمد مری وتی جوانی ءَ گوں لھتیں سنگتاں 1958 ءِ گھگیری ءَ چه نواب نوروز ھان ءِ دزگیری ءَ پد په وتی سنگتانی کمک ءَ کوھلو داں جھالاوان ءَ پیادگ ءَ شتگ ءُ وتی گھگیری زند بندات کرتگ ، چه ایشی ءَ پد وتی سرجمیں زند ءَ بلوچ راجی زرمبشت ءِ سپاھی یے بیتگ ، آ نه ایوک ءَ نواب نوروز ھان ءِ زرمبشت ءِ شاھد بیتگ بلکیں یک ھواریں سنگتے ھم بیتگ ، آئی ءِ زندمان مھکمی ءِ چیدگ بیتگ که په کسانیں لالچ ءُ نه په گرانیں جاوراں بدل نه بیتگ ، آئی ءِ زھگ زپر مری بلوچ ءِ انوگیں راجی زرمبشت ءَ شھید بیتگ ءُ آئی ءَ وتی کھول ءِ بے کساسیں شھیدانی گم دل ءَ بیتگ۔
آئی ءَ گوشتگ که کماندار ملک ھان مھمد مری چه استاد جنرل اسلم ءِ نزیکیں سنگتاں بیتگ، سال 2005 ءَ ھما وھد ءَ که استاد اسلم بلوچ بولان بنجل ءِ کماندارے ءَ راجی جھد ءِ سروکے ءَ کنگ ءَ بیتگ ملک ھان مھمد مری نه ایوک ءَ گوں آئی ءَ نزیک بیتگ بلکیں شون دیوک ءُ لیکھی ھمراه ھم جوڑ بیتگ ، اے سنگتی وھد ءُ جاورانی لاچاری ءِ ھاتر ءَ نه بیتگ بلکیں یک لیکھی ھواری ءِ بنیاد ءَ بیتگ که گوں گوزگ ءَ مھکم تر بیتگ ، وھدے که شھید جنرل استاد اسلم ءَ بی ایل اے ءِ گل یکبرے پد ءَ نوک بندات کرتگ ءُ زرمبشت ءُ گل یک ادارھی ءُ آشوبی رِد ءُ بندے ءِ نیمگ ءَ برت گڑا ملک ھان مھمد مری چه ھما کمانداران بیتگ که آئی ءَ کٹمی ربیدگ ، کھولی سیادی ءُ آدگه سیتّ ءُ نپ یل کرتگ اَنت ءُ گوں اے بدلی ءَ یکراه بیتگ ، آ چه ھما مردماں بیتگ که نه ایوک ءَ اسلم بلوچ ءِ لیکھ ءِ منّوگر بیتگ بلکیں داں وتی زند ءِ گڈی وھد ءَ اے لیکھ ءِ سر ءَ اوشتوک بیتگ ، آئی ءِ اِے سیادی زاتی سیادی یے نه بلکیں چه لیکھی بنیاد ءَ بیتگ که اسلم بلوچ ءَ گوں لیکھی آجوئی ءُ آشوبی رِد ءُ بند ءَ زرمبشت ءِ ارواه ءَ بکشاتگ۔
جارکش ءَ گوشتگ که چه بی ایل اے گل ءِ بنداتی رد ءُ بند ءِ بے تواریں جوڑینگ ءَ داں گرانیں وھداں گل ءِ نوک کنگ ءُ تھی کارانی یکشلیں مھکمی ءِ پھازداری ءَ ملک ھان مھمد مری ءَ ھما کرد پیلو کرتگ اَنت که ایشاں بس ھما مردم سرپد بنت که آ زرمبشت ءِ تھی کاراں سرپد اَنت ، آئی ءِ زند ءِ نه ایوک ءَ گوں جنگی کاراں ، بلکیں گوں لیکھی ، ربیدگی ، سیاسی ءُ گل ءِ کاراں ھمراه بیتگ۔
آئی ءَ گوشتگ که آ چه دراجکشیں وھدے ءَ نادراھی ءَ پد ھشتاد ءُ شش سالی اُمبر ءَ بیران بیتگ ءُ گل پیسله ءِ رد ءَ آئی ءِ کل ءُ کپن کنگ گوں راجی شرپ ءُ ازّت ءَ کنگ بیتگ ، مرچی آئی ءِ یات ءَ راجی کچ ءَ ستک شانی ندر کن اِیں دانکه آئی ءِ کرد بلوچ راجی گوستانک ءِ بھر جوڑ به بنت۔
جارکش ءَ گوشتگ که بی ایل اے ، کماندار ملک ھان مھمد مری ءِ بیرانی نه ایوک ءَ په گل ءَ ٹپے سرپد بیت بلکیں زرمبشت ءِ چه ھما درسیں کردانی ھم چیدگ اِنت که زاھر ءَ بے توار اَنت بلے چوناھا په راجدپتر ءِ چیر ءُ سر کنگ ءَ وتی کرداں پیلو کنگ اَنت ، آئی روگ ءَ ما سکا مزنیں کمی یے مارگ ءَ اِیں ، بلے چه آئی ءِ زند ءَ ما ھمے در بر اِیں که مردم بلکیں چه مئے میان ءَ رو اَنت بلے آیانی کول ءُ دیمونی ءِ درچ برجاه بیت۔
جیھند بلوچ ءَ درشان ءِ گڈی ءَ گوشتگ که بی ایل اے گوں آئی ءِ کھول ، نزیکیں سنگت ءُ ھما درسیں کارکناں که آیاں کماندار ملک ھان مھمد مری پیمیں سروکے ءِ ھمراھی ءَ ھمک شپ ءُ روچ په جھد ءَ گوازینتگ دلپدردی ءَ درشان کنت ، ما آئی ءِ لیکھی وارس ءِ پارست ءَ ھمے کول ءَ کن اِیں که آئی یات ءُ جھد ءِ گل ءِ کارانی بنیاد ءَ مھکم کن ایں۔
