بلوچ وومن پورم ءِ سروک ڈاکٹر شلی بلوچ ءَ ماں رسانکدر ءَ وتی شنگ کرتگیں درشانےءَ گوشتگ کہ بلوچ پُسگانی جنگ ءُ کُشگ ءِ درچ گوں ترندی ءَ برجاہ ءَ اِنت ، آواران یک ملیٹری وار زونے کہ ھمک روچ ءِ ھساب ءَ بلوچ تنگوئیں سرانی تیر سُپتگیں جون دور دیگ بوگ ءَ اَنت، اے ھند ءَ زوراکی وتی سیمسراں سر اِنت پھازداریں لشکر پہ وتی زاتی کاراں مردماں تنگ کن اَنت ءُ آیاں مزدوری گِر اَنت اگاں یکے مکن بہ کنت گڑا آ آزار دیگ بیت، ھر روچ زالبول ءُ مردیناں وتی کمیپاں لوٹارینگ ءُ آیاں سسائی ءُ جانی آزار دیگ ءَ اَنت۔
آئیءَ گوشتگ کہ آواران ءَ وھدیکہ گندئے انچو گُمان بیت مردم نوزدھمی کرن ءَ زندگی کنگ ءَ اَنت، اود ءِ جامنند چہ زند ءِ ھمک آسراتی ءَ زبھر کنگ بوتگ اَنت پرچا کہ زوراک ھچبر نہ لوٹ ایت کہ ایردستیں راج دیمروئی بہ کنت آ مُدام ایردستیں راج ءَ تھاروکی ءِ تہ ءَ کنگ لو ٹ ایت۔
ڈاکٹر شلی بلوچ ءَ گوشتگ کہ ماھے پیسر ھپت گار ءُ بیگوائیں مردمانی لاش کھولاں سوگات کنگ بیتگ آیانی تہ ءَ لتیپ بلوچ ءِ چُک ھم ھوار اَت ءُ کمو روچ پیسر لتیپ بلوچ وپتگیں واب ءَ تیر باران کنگ بیت ، ءُدوشی آواران مالار مچی ءَ ریاستی ادارھانی نیمگ ءَ چہ تیر گواری ءَ یک زالبول ءُ مردینے شھید بیت ءُ یک زالبولے ٹپی بیت ،کھول لاشاں زور اَنت دگانی سر ءَ زھرشانی کن اَنت۔
آئی ءَ گوشتگ کہ اے زوراکی ءِ بگیری ءَ اگاں ما انچو بے توار بوت ایں گڑاھمے وڑ ءَ ھر روچ بلوچ ءِتنگوئیں سرانی جون مارا سوگات کنگ بنت ، مارا گوں یکجاھی ءُ یکمشتی ءَ ریاستی زوراکیانی دیمپانی کنگی اِنت ءُ بلوچ ءِ ھمک ھون ءِ ترمپ ءِ ھساب گِرگی اِنت۔
ڈاکٹر شلی بلوچ ءَ گوشتگ کہ من گوں پُر مھریں بلوچ راج ءَ دزبندی کن آں کہ کھول ءِ توار جوڑ بہ بنت ءُ من آواران ءِ لس مھلوک ءُگوں کاروباری مردماں گوں دزبندی کن آں کہ بی ڈبلیو ایپءِ بانداتیں ھڑتال ءِ جار ءِ کمک ءَ بہ کن اَنت۔
