کراچی: چہ ماری پور ءِ ھند ٹیکری ولیج ءَ پاکستانی لشکر ءِ دست ءَ زور بیگواہ کنگ بیتگیں شیراز ءُ سیلان ءِ گھار گل سدا بلوچ ءَ پریس کانپریس کرتگ ءُ گوشتگ کہ دوئیں ورنا 23 مئی 2025 ءِ شپ ءَ سی ٹی ڈی ءِ کارمنداں درکانودی آوار جتگ ءُ بیگواہ کرتگ اَنت کہ انگت ءَ بیگواہ اَنت۔
آئی ءَ گوشتگ کہ شیراز بلوچ ءِ پاد ءَ راڑ مان اِنت پمشکا آ دوبر آپریشن کنگ بیتگ ءُ سیمی آپریشن نوکی بیت بلے آ چہ الاج ءَ زبھر اِنت۔ دوئیں برات جپاکشیں مردم اَنت ءُ آیاں مزدوری کرتگ ءُ وتی کھول والینتگ۔
گھار ءِ گوشگ اِنت کہ ما ھمے جستءَ کن ایں اگاں مئے براتانی سر ءَچونیں ھم بھتامے ھست گڑا آمیدگس ءَپیش کنگ بہ بنت، بلے اے وڑیں زوریں بیگواھیں چونیں ھم راجمستری ءُ راھبندی چاگردے ءَ منگ نہ بیت۔
آئی ءَ گوں سرکار، انسانی ھکانی ادارہ ءُ سول سوسائٹی ءَ لوٹ کرتگ ءُ گوشتگ کہ پہ مئے براتانی آجوئی ءَ زوت گامگیج زورگ بہ بیت دانکہ مئے کھول پہ ایمنی وتی زندگی ءَ بہ گوازین ایت۔
گھار گل سدا بلو چ ءَ گوشتگ کہ ما پہ ایمنی ءُ راھبند ءِ رد ءَ توار چست کن این ءُ ھمے اوست ءَ دار ایں کہ مئے گون ءَ انساپ کنگ بیت۔
