
بلوچ یکجھتی کمیٹی ءِ سروک سمی دین ءَ ماں رسانکدرءَ وتی شنگ کرتگیں درشانے ءَ نبشتگ کہ اے آواران ءَ ریاستی زوراکیانی دگہ یک منانکے۔ چہ آواران ءَ ھالانی رد ءَ دوشی ریاستی لشکر ءَآوارانءِ ھندمالار مچی ءَ شپ ءِ یک ءَ اناگت ءَ بیڑ برتگ ءُ کاروائی کرتگ جتائیں گسانی سر ءَ ارش کرتگ۔
آئی ءَ گوشتگ کہ ھندی مردماں آوارجنی ءِ بگیری ءَ گھگیری کرتگ گڑا لشکر ءَ تیرگواری بندات کرتگ۔ ھمے ناشریں تیرگواریانی آسر ءَ ورنائیں نئیم بلوچ ءُ جنین ھوری بلوچ جاھی بیران بیتگ اَنت۔ نئیم ءِ مات دادی بلوچ ءَ دو تیراں سپتگ ءُ آ سکا ٹپی بیتگ۔ بژن ءِ گپ ھمیش اِنت کہ ٹپیگیں جنین سرجمیں شپ ءَ پہ الاج ءَ برگ ءَ نہ اشتگ ءُ دومی روچ ءَ آ گوں ناگیگیں جاوراں آواران نادراھجاہ ءَ برگ بیتگ۔
سمی دینءَ گوشتگ کہ اے زوراکی ءِ بگیری ءَ کھول ءُ ھندی مردماں زھرشانی کرتگ ءُ زھرشانی برجاہ اِنت۔
آئی ءَ گوشتگ کہ اے زوراکی بلوچستان ءِ لس مردمانی سر ءَ ریاست ءِ زوراکیانی نوک ءُ دردناکیں منانکے۔ ما ھمے جست ءَ کن ایں کہ داں کدی بلوچستان ءِ بے میاریں شھریانی کشت ءُ کوش برجاہ بیت۔