بارکان: تنگ کریر ءَ سی ٹی ڈی ءَ دروگیں میڑ ءَ سَے مردم کشتگ۔
سی ٹی ڈی ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ بارکان ءِ ھند تنگ کریر ءَ گوں سلاه بندیں مردماں میڑے ءَ سے سلاہ بندیں مردم کشتگ ءُ آدگہ درکپگ ءَ سوبین بوتگ اَنت۔
آئی ءَ گوشتگ کہ چہ کشگ بوتگیں مردماں دو سی تیر، یک وتاسے ءُ دو بمب دزکپتگ۔ کشگ بوتگیں مردم سلاہ بندیں گلانی باسک اَنت۔
ھندی بنشون ءِ رد ءَ مرچی سھب ءَ سی ٹی ڈی ءَ رکنی نادراھجاہ ءَ سَے مردم ءِ لاش سر کرتگ ءُ گوشتگ کہ دیم پہ دیمی میڑ ءَ جنگ بوتگ اَنت۔ بلے کشگ بوتگیں مردم چہ زوربیگواهیں مردماں پجارگ بوتگ اَنت۔
دروگیں میڑ ءَ کشگ بوتگیں مردمانی ابدُلرھمان بزدار ء پیز مھمد بزدار جھمنند راڑہ شم، پرید بزدار ء رھیم بزدار جھمنند راڑہ شم ءُ سلتان مری ء ائیدو مری اِنت کہ آ لھتیں ماہ پیش زوربیگواہ کنگ بوتگ اَنت۔
کشگ بوتگیں مردمانی کھولاں سی ٹی ڈی ءِ ٹاپار رد کرتگ ءُ گوشتگ کہ مئے مردم پیسر ءَ پاکستانی لشکر ءَ زوربیگواہ کرتگ اَنت ءُ مرچی دروگیں میڑ ءَ آیانی کشگ ءِ ٹاپار جنگ ءُ گوں سلاه بندیں گلاں بندوک کنگ ءَ اِنت۔
